450 myń teńge – Adaldyq departamentiniń basshysy jalaqysyn atady

NUR-SULTAN. QazAqparat - QR Sybaılas jemqorlyqqa qarsy is-qımyl agenttigi Adaldyq departamentiniń basshysy Danııar Sabyrbaev jalaqysynyń kólemin atady, dep habarlaıdy QazAqparat tilshisi.

«Jalaqym 450 myń teńge. Osyndaı haıptan keıin barlyq jınalystarymdy osy máseleden bastaımyn. Bul taqyrypty qozǵaǵan jýrnalısterge rahmet», - dedi ol.

Sonymen qatar ol elimizdiń Aýyl sharýashylyǵy vıtse-mınıstri Gúlmıra Isaevanyń ótken jyldyń jeltoqsanynda 2,5 mln teńge kóleminde syıaqy alýyna qatysty aqparatqa pikir bildirdi.

«Biz jalaqymyzdy maqtan etemiz jáne muny jetistigimiz dep sanaımyz. Bir jaǵynan mundaı jalaqy tóleı alatyndyǵyna Aýyl sharýashylyǵy mınıstrligi úshin qýanyshtymyz. Vıtse-mınıstrdiń jaýapkershilik deńgeıin, uıym úshin mundaı laýazymnyń mańyzdylyq deńgeıin eskerer bolsaq, bul jalaqy laıyqty dep oılaımyn», - dedi departament basshysy.

Danııar Sabyrbaev memlekettik qyzmetshilerdiń laıyqty jalaqy alyp, basqa máselelerge bas qatyrmaýyna tilekshi ekendigin aıtty.

«Óıtkeni laıyqty jalaqy – bul jemqorlyqqa qarsy is-qımyl bazısiniń biri. Memlekettik qyzmetshiler nege az jalaqy alýy tıis dep oılaısyzdar? Menińshe, ol eńbek demalysy tólemin, syıaqy alsa jáne bárin qossa 3 mln shyǵyp qalar. Múmkin ol syıaqy men úsh jyldyq eńbek demalysy tólemin alǵan shyǵar», - dedi ol.