45 jyl boıy qaıda júrsem de «Atamekendi» aýzymnan tastamaımyn - E.Hasanǵalıev
ASTANA. QazAqparat - QR Halyq ártisi, Memlekettik syılyqtyń ıegeri, belgili ánshi-kompozıtor Eskendir Hasanǵalıev «Túrkistan» gazetine bergen suhbatynda «Atameken» ániniń tarıhyn aıtyp, aldaǵy 13 aqpan kúni Almatydaǵy Respýblıka saraıynda ótetin mereıtoılyq kontsertiniń daıyndyq, josparymen bólisti.
«Mereıtoılyq kontsert bolǵandyqtan bıylǵy keshti ózgeshe qylyp ótkizýdiń joldaryn qarastyrdyq. Otbasymmen aqyldasa kele, retro ánderge basymdyq bergendi jón kórdik. «Asyl arman», «Boztorǵaı», «Ádemi-aý», «Janarym» syndy saǵynyshqa aınalǵan ánderdi óner juldyzdarymen birge shyrqap, jurtym bir maýqyn bassa deımin. Umytqandar bolsa, qaıta esine alsyn. Sol ánder arqyly meniń qurdastarym jastyq shaqtaryna, ini-qaryndastarym bozbala-boıjetken kúnderine, ul-qyzdarym balalyq bal dáýrenge bir saıahat jasap qaıtsa, bizdiń maqsatymyzdyń oryndalǵany sol bolmaq», - deıdi E.Hasanǵalıev. Keshte Maıra Іlııasova men Maıra Muhamedqyzy, Nurlan Abdýllın, «MuzArt» pen «Jigitter» jáne t.b. óner juldyzdary qatysady. Basylymǵa bergen suhbatynda ánshi-kompazıtor «Atameken» ániniń shyǵý tarıhymen de bólisti. Onyń aıtýynsha, 1968 jyldan bastap, qazaq ónerpazdary gastroldik saparmen alys-jaqyn elderge shyǵa bastady. Sonda ózge eldiń sahnasynda qazaqtyń ór minezin, kóńiliniń darqandyǵy men jeriniń baılyǵyn tanytatyn bir án jazý armany bolǵan. «Uzaq ýaqyt izdenisten keıin 1970 jyly «Atameken» dúnıege keldi. Mýzykanyń kóńilimnen shyqqany sondaı, tez arada sahnaǵa alyp shyǵyp, jurtpen bóliskim keldi. Alyp-ushyp sózin jazatyn aqyn izdedim. Oıyma birden Qadyr Myrza Áli tústi. Áýen aqynnyń kóńilinen shyqty. Sóz jazyp berýge kelisti. Sol jyly Respýblıka saraıynda Qazaq KSR-iniń 50 jyldyǵyna arnalǵan úlken kontsert ótti. Atalǵan keshte «Atamekendi» alǵash ret Nurǵalı Núsipjanov ekeýmiz qos daýysta oryndadyq. Dál sol jyly Odaq ónerpazdary tuńǵysh ret Shvetsııa men Fınlıandııaǵa gastroldik saparmen bardy. Óner delegatsııasynyń ishinde biz de boldyq. Shvetsııa astanasy Stokgolmniń eń úlken sahnasynda «Atameken» shyrqaldy. Ándi oryndap bolǵanymyz sol edi, bir top adam sahnaǵa qaraı qaýmalaı bastady. Jasy men jasamysy bar, arasynda bala-shaǵa da júr. Júzderi jyly ushyraı ketti, sóıtsek óz qandastarymyz eken. Ol kezde tártip qatal. Oqys qımyl jasap, artyq sóz aıtýǵa bolmaıdy. Qol jýý úshin de ruqsat suraıtynbyz. Qaraqurym halyq jabyla qushaqtap, betimizden súıip jatyr, kózderine jas alǵandar da bar. Ne isterimizdi bilmeı ańtarylyp qaldyq. Sóıtsek, bul án baýyrlardyń týǵan jerge degen saǵynyshyn mazdatyp jibergen eken. «Óshkenimizdi qaıta jańǵyrttyńdar, rahmet senderge», - dep alǵystaryn jaýdyrdy. Sodan beri 45 jyl boıy qaıda júrsem de, qandaı sahnaǵa shyqsam da, «Atamekendi» aýzymnan tastamaımyn», - dedi E.Hasanǵalıev.
