45 jobanyń ıesi ýtılalym qarjysynan bas tartqan

ASTANA. KAZINFORM – Ekologııa jáne tabıǵı resýrstar mınıstri Erlan Nysanbaev Úkimet otyrysynda ýtılalym qarjysynyń esebinen iske asyrylatyn jobalar týraly málimet berdi. 

- Memleket basshysynyń tapsyrmasyn oryndaý aıasynda mınıstrlik, ákimdikter usynǵan, ýtıltólemder esebinen qarjylandyrylatyn 232 mlrd teńgege 94 jobadan turatyn pýl ázirledi. Qazirgi kezde málimdelgen 94 jobanyń 45-i baǵdarlamaǵa qatysýdan bas tartty. Ákimdikter jobalardy tolyqqandy pysyqtap, qalyptastyrý kezinde qatysýǵa múmkindigi joq jobalardy alyp tastaǵanda bundaı jaǵdaı bolmaıtyn edi, - dedi Erlan Nysanbaev.

Mınıstr ýtılalym qarjysynan bas tartqan jobalar ásirese Túrkistan jáne Jetisý oblystarynda kóp ekenin atap ótti. 

- Sonymen qatar óńirlerdiń ákimdikteri jobalardy súıemeldeý boıynsha jumysty tıisti deńgeıde júrgizbedi. Árbir jobany pysyqtaý barysynda ákimdikterdiń janyndaǵy qurylymdar qajetti deńgeıde qoldaǵan jaǵdaıda qujattardy tapsyrý merzimderin jáne olardy kelisý protsesin aıtarlyqtaı qysqartýǵa bolar edi. Osyǵan baılanysty ákimdikterge jobalardy iske asyrýdyń joldaryn qaıta qarastyrý qajet, - dedi vedomstvo basshysy.

Buǵan deıin «Taza Qazaqstan» aktsııasynda mıllıon tonnaǵa jýyq qoqys shyǵarylǵany aıtylǵan edi.