45 jyl buryn alǵashqy álem kýbogyna qatysqan qazaq boksshylarynyń jeńisi
ASTANA. KAZINFORM — Qazaqstannyń ulttyq olımpıada komıteti qazaq boksshylary alǵash ret qatysqan 1979 jylǵy álem kýbogynan foto jarııalady. Onda Serik Qonaqbaev, Vıktor Demıanenko, Vladımır Shın (Ózbekstan) jáne Kamıl Safın beınelengen. Úsh sportshy da sol jarysta jeńis tuǵyryna kóterildi. Vıktor Demıanenko 60 kelide, Serik Qonaqbaev 63,5 kelide altyn medal jeńip aldy. Petropavl oblysynyń týmasy Kamıl Safın (48 keli) kúmiske qol jetkizdi. Bul sýrettiń tarıhy jaıly Olympic.kz materıalyn oqyrman nazaryna usynamyz.
1979 jyl boks álemindegi mańyzdy oqıǵalardyń biri boldy. Dál osy jyly alǵash ret álem kýbogi uıymdastyryldy. Tarıhı jarysqa alǵash ret qatysqan sportshylar arasynda KSRO quramynda óner kórsetken qazaqstandyq boksshylar da bar.
Otandyq bylǵary qolǵap sheberleri úlken jetistikke jetip, olardyń esimi áıgili Madison Square Garden-degi arnaıy taqtaǵa jazyldy.
Alǵashynda týrnırge álemniń 30 memleketinen júzden asa boksshy jınalýy tıis edi. Alaıda, komandalar tolyq qurammen kele almaı, Afrıkanyń ekinshi quramasy AQSh-qa jetken joq.
Medaldar 11 salmaq dárejesinde oınatyldy. Al kýbok ıeleri jıǵan upaı sany boıynsha anyqtaldy. Negizgi báseke AQSh pen KSRO quramalary arasynda bolatyny boljanǵan. Aıtqandaı-aq, eki el sportshylary fınalǵa kóbirek joldama aldy.
Týrnırde jeti altyn, eki kúmis jáne bir qola medal ıelengen amerıkalyqtar kýbokti óz elinde qaldyrdy (49 upaı).
Keńestik boksshylar úsh altyn, bes kúmis jáne eki qolamen (39 upaı) ekinshi orynǵa turaqtady. Bir qyzyǵy, sol básekege qatysqan úsh qazaqstandyq sportshy da tuǵyr bıiginen kórindi.
60 keli salmaqtaǵy fınaldyq básekede Vıktor Demıanenko amerıkalyq Deıv Armstrongqa aıla qaldyrmady.
63,5 kelide judyryqtasqan Serik Qonaqbaev aqtyq synda Lemýeel Steplsten basym tústi.
Al kúmis medaldi Petropavl túlegi Kamıl Safın (48 keli) enshiledi.
Aǵa bapker Alekseı Kıselev álem kýbogi aıaqtalǵan boıda Safınniń amerıkalyq Rıchı Sandovaldy jeńetin múmkindigi bolǵanyn aıtty.
«Jigitter esh sasqan joq, óz múmkindigin tolyq kórsetti. Eger tóreshiler qyryn qaramaǵanda, nátıje basqasha bolar edi. Kamıl Safın amerıkalyq boksshymen judyryqtasqanda janyp ketti. Qarsylasyna jol berse de, jeńiske jetetin áleýeti bar edi. Vıktor Demıanenko jaqsy óner kórsetti. 60 kelidegi álem myqtylaarynyń biri ekenin dáleldep, Armstrongty aıqyn basymdyqpen jeńdi. Serik Qonaqbev óz kezdesýin saýatty ári tehnıkalyq turǵydan minsiz ótkizdi. Sál asyǵys tanytqan shyǵar, biraq jaqsy jeńdi», — dedi sol kezde «Sovetskıı sport» basylymyna suhbat bergen Kıselev.
Aıta keteıik, KSRO sapyndaǵy úshinshi altyndy Ózbekstanda týǵan Vladımır Shın jeńip aldy.
Jarystan soń bas keıipkerlerdiń barlyǵy da osy bir estelik sýretke tústi. Bul foto keıin tarıh qoınýyna endi.
Sýrette Demıanenko, Qonaqbaev, Shın, Safın jáne Donald Hall bastaǵan Halyqaralyq federatsııanyń fýnktsıonerleri bar.
Ókinishke qaraı, tarıhı fotonyń avtory belgisiz. Sýret Vıktor Demıanenkonyń jeke muraǵatynan alyndy.
Serik Qonaqbaev pen Vıktor Demıankenkonyń esimi Madison Square Garden-degi mármár taqtaǵa álem kýbogy jeńimpazdarymen birge oıylyp jazylǵan.
Vıktor Leondıovıch jeke ózi kórmegenin, alaıda, bul aqparattan qulaǵdar ekenin aıtady. Sondaı-aq, dańqty boksshy týrnır qarsańynda Nıý-Iorkte basynan ótken oqıǵany baıandady.
«Nıý-Iorktegi qonaqúıde KSRO quramasy músheleri lıftpen óz bólmemizge kóterilip kele jattyq. Kezekti qabattardyń birinen bir top amerıkalyq boksshylar kirdi. Kenet 75 kelide bokstasatyn sportshy meni qalaı uryp qulatynyn ymmen kórsetip, tisterimdi ushyryp jiberetinin de ısharamen kórsetti. Men de kóp oılanbaı oǵan sol soqqylarymdy kórsetip, sońynda ony aıaqpen tepkilep tastaıtynymdy aıttym. Osyny kórgen qasymdaǵy jigitter kúlkilerin tyıa almaı, meni arqamnan qaǵa bastady. Sóıtip olarmen de dostasyp kettik», — deıdi áıgili boksshy.
Rasynda, sport hronıkasy umytylmas estelikterden jáne kútpegen oqıǵalardan turady. Al mundaǵy sıýjetter foto men vıdeo sheńberinen áldeqashan asyp ketken.
