45 jastaǵy áıel jasóspirimniń basyn jaryp tunshyqtyrdy
ALMATY. QazAqparat - Almatyda 45 jastaǵy áıel jasóspirim qyzdyń basyn jaryp, tunshyqtyrǵan, dep habarlaıdy QazAqparat tilshisi.
Bul týraly 13 jastaǵy qyzdyń anasy Facebook-te jarııalady.
Anasynyń aıtýynsha, oqıǵa balalar alańynda bolǵan.13 jastaǵy jasóspirim qurbylarymen átkenshek teýip otyrǵan.
Balalardyń shýy 45 jastaǵy áıeldiń ashýyn týdyrǵan bolý kerek.
«Búgin bul áıel meniń qyzymdy uryp, aýrýhanaǵa túsirdi. 45 jastaǵy áıel. Ashýy óte qatty. Balamnyń jaralaryn dárigerler tikti. Aýrýhanada jatyrmyz", - dedi ol.
Anasynyń aıtýynsha, qyzǵa tek balalar arasha túsken.
"Bul oqıǵa kezinde eresek adamdar da qasynda bolǵan. Ashýǵa býlyqqan áıel qyzymdy tunshyqtyrǵanda qurbylary ajyratýǵa tyrysqan. "Baýyzdap óltiremin" dep aıǵaılaǵan. Aýzynan aq ıt kirip, kók ıt shyqqan", - dedi anasy.
Balasynyń bul kúıin kórgen ol birden polıtsııaǵa aryzdandy.
Aýrýhanada jasóspirimge mıy shaıqalǵan, samaı tusynyń jumsaq tinderi jyrtylǵan, moıyn jumsaq túnderiniń aýyrsynýy degen dıagnoz qoıyldy.
Bala shamamen 1 apta aýrýhanada jatady.
