45 mlrd teńgelik zańsyz eksport: UQK zańsyz munaı ekpsporty shemasyn áshkereledi
ASTANA. KAZINFORM- Ulttyq qaýipsizdik komıteti munaı ónimderin Qazaqstannan shetelge zańsyz eksporttaýmen aınalysqan uıymdasqan toptyń áreketine tosqaýyl qoıdy.
Komıtettiń baspasóz qyzmetiniń habarlaýynsha, 2019–2023 jyldary «Batys Nefte Trade» JShS arqyly shetelge 160 myń tonnadan astam munaı ónimi zańsyz shyǵarylǵan. Operatsııalardyń jalpy kólemi shamamen 45 mlrd teńgege baǵalanǵan.
Tergeý derekterine sáıkes, qylmystyq shemany Mańǵystaý oblysynyń kásipkeri uıymdastyrǵan. Ol jer qoınaýyn paıdalanýshy kompanııalarmen shıki munaı satyp alýǵa, keıin ony «Standart Petroleum» jáne «Mangystau Oil Refining» shaǵyn munaı óńdeý zaýyttarynda óńdeýge sharttar jasasqan. Sondaı-aq jalǵan sapa pasporttary resimdelgen.
Odan ári daıyn ónim pesh otyny retinde kórsetilip, Aqtaý teńiz porty arqyly tankerlermen shetelge shyǵarylǵan.
Bıyl júrgizilgen protsestik is-sharalar kesheni aıasynda qylmystyq is fıgýranttarynyń aktıvteri, shaǵyn munaı óńdeý zaýyttary, tanker jáne ózge de múlik tárkilendi.
Jalpy, zańsyz alynǵan kirister men tólenbegen salyqtar boıynsha 2 mlrd teńgeden astam qarajat memleket kirisine óndirildi.
-Buǵan deıin Aqtaý qalalyq sotynyń úkimimen uıymdasqan qylmystyq toptyń bes qatysýshysy, onyń ishinde shaǵyn munaı óńdeý zaýyttary men treıderlik kompanııanyń basshylary Qazaqstan Respýblıkasy Qylmystyq kodeksiniń 234-baby 3-bóligi jáne 262-baby 2-bóligi boıynsha 8 jylǵa bas bostandyǵynan aıyrylǵan. Qylmystyq shemany uıymdastyrýshy halyqaralyq izdeýde júr,-delingen habarlamada.
Osyǵan deıin UQK halyqaralyq esirtki arnasyn joıǵan bolatyn.
