4,5 mlrd teńge jymqyrǵan esepshiler isi: eki fıgýranttyń jazasy jeńildedi
TALDYQORǴAN. KAZINFORM — Jetisý oblysynda atyshýly «esepshiler isi» apellıatsııalyq sotta qaraldy. 4,5 mlrd teńge memleket qarjysyn qoldy etken býhgalterlerge qatysty úkim bıyl jazda jarııalanǵan. Oblystyq qylmystyq ister sotynyń sýdıasy 18 esepshini 7 jyldan 15 jylǵa deıin bas bostandyǵynan aıyrǵan bolatyn. Solardyń ekeýi apellıatsııa arqyly jazalaryn jeńildetti.
Sýdıa sottalǵan Sharıpova men Barǵanaevanyń jeti jyldyq merzimderin shartty túrdegi jazaǵa aýystyrdy. Óıtkeni olar memleketke keltirgen shyǵyndy tolyq ótegen eken.
Al qalǵan esepshilerge qatysty úkim ózgergen joq. Osydan 4 aı buryn qylmystyq istiń negizgi 3 uıymdastyrýshysyn 12 jyldan 15 jylǵa deıin, 15 sottalýshyny 7 jyldan 11 jylǵa deıin bas bostandyǵynan aıyrǵan bolatyn.
Taǵy 2 esepshi shartty túrde sottalyp, bireýine qatysty is onyń qaıtys bolýyna baılanysty toqtatylǵan edi. Alaıda sottalǵandardyń qorǵaýshylary «Uıymdasqan qylmystyq top qurý» babyn ózgertýdi surap otyr.
«Negizi «OPG» degen sóz bul jerde bolmaýy kerek edi. Menińshe, «hışenıe» bolatyn edi. Árkimniń óziniń qansha jasaǵanyn qaraý kerek edi. Birinshi satydaǵy sot uıymdasqan qylmystyq top týraly zańda joq, kúshi joıylǵan Joǵarǵy sottyń qaýlysyn qoldanǵan. Bir sózben aıtqanda myna otyrǵan adamdar 262-bap boıynsha sottalyp otyr. Qoldanysta joq zańmen», — deıdi advokat Baýyrjan Baltabaev.
Eske salaıyq, buǵan deıin Jetisý oblysynda bilim bóliminiń úsh býhgalteri 34 mln aqsha jymqyrǵanyn jazǵanbyz.
Sonymen qatar, jaqynda SQO-da 4,5 mln teńge somasynda bıýdjet qarajatyn urlaǵan aýdandyq bilim bóliminiń býhgalteri sottalǵany belgili boldy.
Budan bólek, Shymkentte 5 164 921 teńgeni qoldy etken býhgalter 3 jylǵa sottalǵany habarlandy.