45 mlrd teńge: 279 myńnan astam qazaqstandyq zeınetaqy jınaǵyn áli almaǵan

Jyl saıyn BJZQ «Azamattarǵa arnalǵan úkimet» memlekettik korporatsııasymen birigip BJZQ-da mindetti zeınetaqy jarnalary, mindetti kásiptik zeınetaqy jarnalary esebinen zeınetaqy jınaqtary bar, biraq olar boıynsha zeınetaqy tólemin alý úshin BJZQ-ǵa júginbegen zeınet jasyna tolǵan tulǵalar boıynsha halyqty áleýmettik qorǵaý salasyndaǵy ýákiletti organnyń aqparattyq júıesinde atalǵan adamdarǵa bıýdjet qarajaty esebinen taǵaıyndalǵan jasyna baılanysty jáne memlekettik bazalyq zeınetaqy tólemderiniń bar-joqtyǵyna salystyryp tekserý jumystaryn júrgizedi.

Bul shara atalǵan azamattardyń halyqty áleýmettik qorǵaý salasyndaǵy ýákiletti organnyń aqparattyq júıesinde bıýdjet qarajaty esebinen taǵaıyndalǵan jasyna baılanysty, eńbek ótili úshin beriletin zeınetaqy tólemderiniń jáne memlekettik bazalyq zeınetaqy tóleminiń bar-joǵyn anyqtaý úshin jasalady.

Bıylǵy naýryz aıynan bastap zeınetkerlik jasqa jetken, BJZQ-da erikti zeınetaqy jarnalary esebinen jınaqtary bar, sonyń ishinde 50 jasqa tolýyna nemese múgedektigine baılanysty olardy alýǵa BJZQ-ǵa ótinish jasamaǵan tulǵalarǵa EZJ esebinen zeınetaqy tólemderin ótinishsiz (proaktıvti) taǵaıyndaý tártibi engizildi. Bul tártip te «Azamattarǵa arnalǵan úkimet» memlekettik korporatsııasymen jyl saıyn osyndaı salystyryp tekserýdi kózdeıdi.

Jyl saıynǵy salystyryp tekserý nátıjeleri boıynsha BJZQ Memlekettik korporatsııa arqyly alýshylarǵa zeınetaqy tólemderin proaktıvti formatta júzege asyrady. Memlekettik bıýdjetten zeınetaqy alatyn zeınetkerlerdiń BJZQ-da MZJ, MKZJ jáne EZJ esebinen qalyptasqan zeınetaqy jınaqtary bolsa, olar BJZQ-dan da tólemderdi avtomatty túrde ala bastaıdy.

— 2026 jylǵy 1 mamyrdaǵy jaǵdaı boıynsha, jalpyǵa birdeı belgilengen zeınetkerlik jasqa jetken 279 041 adamnyń MZJ-ny esepke alýǵa arnalǵan jeke zeınetaqy shottaryndaǵy talap etilmegen zeınetaqy jınaqtarynyń jalpy somasy shamamen 45 mlrd teńge. BJZQ memlekettik organdardyń aqparattyq júıelerinen alǵan málimetterge sáıkes, olardyń ishinde: — 155 217 adam qaıtys bolǵan, olardyń zeınetaqy jınaqtaryn muragerleri talap ete alady; — 61 459 adam zańnamada belgilengen tártippen Qazaqstan Respýblıkasynan tys jerlerge turaqty turýǵa ketýdi resimdegen; — 62 365 adam jasyna baılanysty zeınetaqysyn resimdeý úshin Memlekettik korporatsııaǵa (turǵylyqty jeri boıynsha HQKO) áli júginbegen, — delingen habarlamada.

Zeınetaqy tólemderin qalaı alýǵa bolady?

Eske sala keteıik, zeınetaqy jınaqtary BJZQ-daǵy salymshylardyń (alýshylardyń) JZSh-synda esepke alynady, ınvestıtsııalanýyn jalǵastyra beredi jáne olardy alýshylar nemese olardyń muragerleri (alýshy qaıtys bolǵan jaǵdaıda) talap etkenge deıin shotta saqtalady.

Jalpyǵa birdeı belgilengen zeınetkerlik jasqa jetkende

Jasyna baılanysty BJZQ-dan zeınetaqy tólemderin taǵaıyndaý, sondaı-aq memlekettik bıýdjetten bazalyq jáne yntymaqty zeınetaqy taǵaıyndaý úshin alýshylar turǵylyqty jeri boıynsha «Azamattarǵa arnalǵan úkimet» memlekettik korporatsııasyna (HQKO) júginýi qajet.

Bul rette eger alýshynyń BJZQ-da EZJ esebinen zeınetaqy jınaqtary bolyp, biraq olardy alýǵa buryn (50 jasqa tolýyna nemese múgedektigine baılanysty) ótinish bermegen bolsa, oǵan BJZQ-dan EZJ esebinen de zeınetaqy tólemderi birge taǵaıyndalady.

Turaqty turýǵa (TTJ) shetelge ketkende

Qazaqstan Respýblıkasynyń zańdarynda jáne Qazaqstan Respýblıkasy ratıfıkatsııalaǵan halyqaralyq sharttarda ózgeshe kózdelmese, BJZQ-da zeınetaqy jınaqtary bar jáne Qazaqstan Respýblıkasynyń sheginen tys jerlerge turaqty turýǵa ketken sheteldikter men azamattyǵy joq adamdar TTJ-ǵa ketýine baılanysty BJZQ-dan zeınetaqy tólemderin alý quqyǵyn paıdalana alady.

Jınaǵy bar adam qaıtys bolǵan jaǵdaıda

BJZQ-da zeınetaqy jınaqtary bar adam qaıtys bolǵan jaǵdaıda, onyń otbasy múshelerine BJZQ qaıtys bolǵan adamnyń zeınetaqy jınaqtarynyń esebinen tıisti qarjy jylyna arnalǵan respýblıkalyq bıýdjet týraly zańmen belgilengen 94 eselengen aılyq eseptik kórsetkish (AEK) sheginde, biraq qaıtys bolǵan adamnyń JZSh-synda bar qarajattan aspaıtyn mólsherde jerleýge arnalǵan birjolǵy tólemdi júzege asyrady.

Sondaı-aq, zeınetaqy jáne nysanaly jınaqtar Qazaqstan Respýblıkasynyń zańnamasynda belgilengen tártippen muraǵa qaldyrylady. Jınaǵy bar adam qaıtys bolǵannan keıin 6 aı ishinde onyń muragerleri qaıtys bolǵan adamnyń jınaqtary túrindegi muragerlik múlikti rásimdeý jáne muraǵa quqyq týraly kýálikti alý úshin notarıýsqa júginýi tıis. Eger ótinish berý merzimin ótkizip alsa, muraǵa quqyqty qalpyna keltirý úshin sot organdaryna júginý qajet.

Aıta ketelik zeınetaqy jınaǵynyń jetkilikti shegin esepteýdiń jańa tártibi bekitilgen edi.