45 mln teńgege alaıaqtyq jasady degen kúdikti Polshadan ekstradıtsııalandy

ASTANA. KAZINFORM — Qazaqstan Respýblıkasynyń Bas prokýratýrasy, Іshki ister mınıstrligi jáne Syrtqy ister mınıstrliginiń birlesip, asa iri kólemde alaıaqtyq jasaǵany úshin qylmystyq jaýapkershilikke tartý maqsatynda Qazaqstan azamatyn Polshadan ekstradıtsııalady. Bul týraly Qazaqstannyń bas prokýratýrasy málim etti.  

— Ol 2023 jyly Polshadan eki júk kóligin alyp kelýge ýáde berip, jábirlenýshiniń 45 mıllıon teńge kólemindegi qarajatyn ıemdenip, óz mindettemelerin oryndamaı, ıemdengen qarajatpen jasyrynǵan degen kúdikke ilindi, — delingen habarlamada. 

Aǵymdaǵy jylǵy aqpanda ol Bodzentyn qalasynda ustalyp, Qazaqstan Respýblıkasy Bas prokýratýrasynyń suraý salýy boıynsha Otanyna ekstradıtsııalandy. Qazirgi ýaqytta ustaý ızolıatoryna qamaqqa alyndy.

Aıyptalǵan qylmysty jasaǵany úshin múlki tárkilenip, bes jyldan on jylǵa deıingi merzimge bas bostandyǵynan aıyrý jazasy qarastyrylǵan.

Eske sala keteıik, buǵan deıin Pavlodarda bıznes seriktesin óltirgen kúdikti Reseı aýmaǵynda ustalǵan edi.