45 mln teńge para: Almaty Jer qatynastary basqarmasynyń sheneýnigi qamaýǵa alyndy

ALMATY. QazAqparat – Sybaılas jemqorlyqqa qarsy is-qımyl agenttigi Almatynyń jer qatynastary salasynda oryn alǵan júıeli jemqorlyq qylmystaryn tergep jatyr, dep habarlaıdy QazAqparat vedomstvonyń baspasóz qyzmetine silteme jasap.

Máselen, memleket qajettiligi úshin ákimshilik tarapynan jer ýchaskesin satyp alǵany úshin jeke basyna 45 mln teńge somasynda para alǵan qalalyq Jer qatynastary basqarmasy basshysynyń orynbasary mindetin atqarýshyǵa qatysty sotqa deıingi tergeý bastaldy. Sheneýnik sot sanktsııasymen ol qamaýǵa alyndy.

Tergeý sonymen qatar osy basqarmanyń laýazymdy tulǵalary affılırlengen baǵalaýshynyń kómegimen jeke jer ıeleriniń múddesi úshin memlekettik satyp alýǵa jatatyn 8 ýchaskeniń qunyn negizsiz kótergeni anyqtaldy. Nátıjesinde memleket osy ýchaskelerdiń ıelerine shamamen 7,5 mlrd teńge artyq tólegen. Bul rette baǵalaýshynyń bir obekt úshin kórsetiletin qyzmetteriniń quny 2021 jyly ortasha eseppen 68 teńgeni jáne 2022 jyly 10 teńgeni quraǵan.

Sonymen qatar qoldanystaǵy zańnamany óreskel buzýshylyqtar Almaty qalasy Qalalyq josparlaý jáne ýrbanıstıka basqarmasynyń qyzmetinde de anyqtaldy. Basqarmanyń laýazymdy adamdary memleket múddesine qaıshy, jeke turǵyn úı qurylysyna arnalǵan ýchaskelerde kommertsııalyq maqsatta 11 kóppáterli turǵyn úı kesheniniń qurylysyn keliskeni anyqtaldy. Nátıjesinde memleketke atalǵan jer ýchaskeleriniń jalpy somasy 760 mln teńgeden astam tólenbegen kadastrlyq quny túrinde zalal keltirildi.

«Barlyǵy 470-ten astam jer ýchaskesi tekserýmen qamtyldy. Jer qatynastary salasyndaǵy júıeli jemqorlyqty anyqtaý jáne jolyn kesý jumystary jalǵasýda.

Tergeý múddesi úshin ózge aqparat jarııa etýge jatpaıdy. Konstıtýtsııanyń 77-baby 3-tarmaǵynyń 1-tarmaqshasyna jáne Qylmystyq-protsestik kodeksiniń 19-baby 1-bóligine sáıkes, qylmystyq quqyq buzýshylyq jasaýdaǵy kinási sottyń zańdy kúshine engen úkimimen belgilengenge deıin árbir adam kinásiz dep esepteledi», - dedi vedomstvodan.