45 mln kólik: eldegi eń kóp paıdalanylatyn aqyly joldar ataldy
ASTANA. KAZINFORM — 2026 jyldyń alǵashqy jeti aıynda Qazaqstandaǵy respýblıkalyq mańyzy bar aqyly avtomobıl joldarynda 45 mln-ǵa jýyq kólik júrip ótý faktisi tirkeldi. Eń joǵary qozǵalys qarqyny Almaty – Qonaev, Shymkent – Ózbekstan shekarasy jáne Shymkent – Taraz baǵyttarynda baıqaldy.
QazAvtoJol 2026 jylǵy 1 qańtar men 31 shilde aralyǵyndaǵy aqyly joldardaǵy kólik qozǵalysynyń qarqyndylyǵyna taldaý júrgizdi. Jeti aıdyń qorytyndysy boıynsha atalǵan baǵyttarda barlyǵy 44 954 050 kólik júrip ótý faktisi tirkelgen.
Kólik aǵyny boıynsha Almaty – Qonaev ýchaskesi kósh bastap tur. Jeti aı ishinde bul baǵytta 7 149 537 kólik júrip ótken. Bul jalpy kórsetkishtiń shamamen 16%-yn quraıdy. Táýligine orta eseppen 33,7 myńǵa jýyq kólik qatynaǵan.
Ekinshi orynda Shymkent – Ózbekstan shekarasy baǵyty – 5 463 475, úshinshi orynda Shymkent – Taraz ýchaskesi – 3 784 782 kólik.
Alǵashqy bestikke sondaı-aq Taraz – Qaınar – 3 289 935 jáne Shymkent – Qyzylorda – 2 736 666 kórsetkishimen endi.
Jalpy statıstıka kólik qozǵalysynyń eń joǵary qarqyny Almaty aglomeratsııasy men eldiń ońtústik óńirlerinde qalyptasqanyn kórsetedi. Tek tórt ońtústik baǵytta – Shymkent – Ózbekstan shekarasy, Shymkent – Taraz, Taraz – Qaınar jáne Shymkent – Qyzylorda joldarynda jıyntyq eseppen 15,2 mln-nan astam kólik júrip ótken.
Elorda men óńirlerdi baılanystyratyn baǵyttarda da qozǵalys qarqyny joǵary. Astana – Temirtaý ýchaskesinde 2 293 893, Astana – Şýchınsk baǵytynda 2 219 653, al Astana – Pavlodar jolynda 1 401 004 kólik tirkeldi.
2026 jylǵy qańtar–shilde aralyǵyndaǵy aqyly joldardyń tolyq reıtıngi:
1. Almaty – Qonaev — 7 149 537;
2. Shymkent – Ózbekstan shekarasy — 5 463 475;
3. Shymkent – Taraz — 3 784 782;
4. Taraz – Qaınar — 3 289 935;
5. Shymkent – Qyzylorda — 2 736 666;
6. Astana – Temirtaý — 2 293 893;
7. Astana – Şýchınsk — 2 219 653;
8. Qonaev – Taldyqorǵan — 2 178 708;
9. Taraz qalasynyń aınalma joly (Qaınar – Shymkent) — 1 644 729;
10. Qostanaı – Denısovka — 1 535 147;
11. Şýchınsk – Kókshetaý — 1 520 485;
12. Almaty – Qorǵas — 1 500 567;
13. Astana – Pavlodar — 1 401 004;
14. Kókshetaý – Petropavl — 1 075 805;
15. Qyzylorda – Aral — 1 064 024;
16. Balqash – Býrylbaıtal — 942 450;
17. Aqtóbe – RF shekarasy (Orynbor baǵyty) — 779 128;
18. Pavlodar – Semeı – Qalbataý — 746 120;
19. Shý – Býrylbaıtal — 607 895;
20. Qostanaı – RF shekarasy (Troıtsk baǵyty) — 529 273;
21. Qandyaǵash – Maqat — 513 960;
22. Pavlodar – RF shekarasy (Omby baǵyty) — 488 527;
23. Oral – RF shekarasy (Samara baǵyty) — 382 265;
24. Oral – RF shekarasy (Saratov baǵyty) — 323 829;
25. Úsharal – Dostyq — 315 019;
26. Qaraǵandy – Balqash – Býrylbaıtal — 207 661;
27. Taldyqorǵan – Óskemen — 136 056;
28. Beıneý – Aqjigit (Ózbekstan shekarasy) — 87 198;
29. Býrylbaıtal – Kúrti — 36 259.
Reıtıng geografııasy aqyly joldar jelisiniń elimizdiń barlyq derlik óńirindegi negizgi kólik baǵyttaryn qamtıtynyn kórsetedi. Olardyń qatarynda ońtústik pen shyǵystaǵy halyqaralyq dálizder, soltústik jáne batys óńirlerdi Reseı Federatsııasymen baılanystyratyn baǵyttar bar.
Soltústik óńirlerde elordalyq baǵyttardan bólek, Qostanaı – Denısovka, Şýchınsk – Kókshetaý jáne Kókshetaý – Petropavl joldarynda kólik aǵyny joǵary. Pavlodar óńirinde Astana – Pavlodar, Pavlodar – Semeı – Qalbataý jáne Pavlodar – RF shekarasy baǵyttary belsendi paıdalanylýda.
Batys óńirlerde Aqtóbe – RF shekarasy, Qandyaǵash – Maqat, Oral – RF shekarasy (Samara jáne Saratov baǵyttary), Beıneý – Aqjigit joldary joǵary suranysqa ıe.
Shyǵys jáne ońtústik-shyǵys baǵyttarynda Almaty – Qorǵas, Qonaev – Taldyqorǵan jáne Úsharal – Dostyq avtojoldarynda aıtarlyqtaı kólik qozǵalysy tirkeldi.
Bul rette úsh jańa aqyly joldyń kórsetkishterin bólek qarastyrǵan jón. Qaraǵandy – Balqash – Býrylbaıtal jáne Býrylbaıtal – Kúrti ýchaskelerinde aqyly rejım 2026 jylǵy 10 shildeden, al Taldyqorǵan – Óskemen baǵytynda 11 shildeden bastap engizildi. Sondyqtan atalǵan ýchaskeler boıynsha kórsetkishter shilde aıynyń bir bóligin ǵana qamtıdy jáne jeti aı boıy aqyly rejımde jumys istegen joldarmen tikeleı salystyrýǵa kelmeıdi.
Aıta ketelik jańa aqyly joldarmen bir aıda jarty mıllıonnan astam kólik ótti.
