4,5 myń agrarlyq sala ókili kóktemgi dala jumystaryna qajet 612 mlrd teńge nesıe aldy - AShM
ASTANA. KAZINFORM - Memleket basshysynyń egis naýqanyn ýaqtyly ári sapaly ótkizý jónindegi tapsyrmasy aıasynda 2025 jylǵy 1 qazannan ótinim qabyldap jatqan «Keń dala 2» baǵdarlamasyn iske asyrý jumystary júrip jatyr.
QR Aýyl sharýashylyǵy mınıstrligi baspasóz qyzmetiniń habarlaýynsha, bıyl kóktemgi dala jáne egin jınaý jumystaryna 750 mlrd teńge baǵyttaý josparlanǵan. Aýyl sharýashylyǵy taýar óndirýshileri úshin túpkilikti syıaqy mólsherlemesi jyldyq 5%-dy quraıdy.
Búgingi kúni 4,5 myń aýyl sharýashylyǵy taýar óndirýshisi 612 mlrd teńge kóleminde jeńildetilgen nesıe aldy. Bul 7,2 mln gektar egis alqabyn qamtyp otyr.
Sonymen qatar «Damý» qory arqyly nesıelerge kepildik berý tetigi qatar qolǵa alynǵan. Bul tetik nesıe somasynyń 85%-yna deıin kepildik berýge múmkindik beredi. Esepti kezeńde 191 mlrd qarjyǵa 1 125 kepildik berildi.
Aýyl sharýashylyǵy tehnıkasyn jańartý qarqyny artqan. Máselen, 114 mlrd teńgege 2,9 myń arnaıy tehnıka jetkizýge 1,8 myń jeńildetilgen lızıng sharty jasaldy. Salystyrý úshin aıtsaq, 2025 jyldyń osy kezeńinde lızıng kelisimderiniń kólemi 30,4 mlrd teńgeni quraǵan, bul salany jańǵyrtýdyń aıtarlyqtaı qarqyndy ekenin aıǵaqtaıdy.
-Qarjylandyrýdyń erte bastalýy agrarshylarǵa bıylǵa egis naýqanyna aldyn ala daıyndalýǵa jol ashty. Alynǵan qarajat janar-jaǵarmaı materıaldaryn tıimdi baǵamen satyp alýǵa, mıneraldy tyńaıtqyshtar alýǵa, aýyl sharýashylyǵy tehnıkasyn jóndeýge jáne qajetti tuqym qoryn qalyptastyrýǵa baǵyttalady,-delingen habarlamada.
Jeńildetilgen qarjylandyrý kóktemgi dala jumystaryn daıyndaý men ótkizýge, sondaı-aq egin jınaý naýqany men maýsymdyq shyǵyndardy jabýǵa qoljetimdi bolmaq.
Qarajat «Agrarlyq nesıe korporatsııasy» aktsıonerlik qoǵamynyń fılıaldyq jelisi arqyly, sondaı-aq ekinshi deńgeıli bankter, áleýmettik-kásipkerlik korporatsııalar, óńirlik ınvestıtsııalyq ortalyqtar jáne basqa da uıymdar arqyly usynylady.
Osyǵan deıin keıingi 5 jylda aýyl sharýashylyǵy kooperatıvteriniń sany 53% óskeni týraly jazdyq.
