442 myń stýdent JI bazalyq daǵdylaryn meńgerdi
ASTANA. KAZINFORM — Elimizde júzdegen myń stýdentti jasandy ıntellekt kásipkerligine oqytý josparlanyp otyr. Bul týraly Ǵylym jáne joǵary bilim mınıstri Saıasat Nurbek Jasandy ıntellektini damytý jónindegi keńestiń alǵashqy otyrysynda aıtty.
Onyń aıtýynsha, barlyq ýnıversıtet stýdentterine jasandy ıntellekt saýaty men meńgerý daǵdylaryn úıretetin aýqymdy, kópdeńgeıli AI-sana baǵdarlamasy iske qosyldy.
— Birinshi kezeńde barlyq stýdentter jasandy ıntellektiniń bazalyq daǵdylaryn meńgeredi. Shamamen 442 myń sertıfıkat stýdentterge tabystaldy, biz bakalavrıat stýdentteriniń 70%-yn qamtydyq jáne jyl sońyna deıin bul kórsetkishti 100%-ǵa jetkizýdi josparlap otyrmyz, — dedi Saıasat Nurbek.
Ekinshi kezeń JI damytý jónindegi keńes músheleriniń qatysýymen ázirlenedi. Onyń maqsaty — júzdegen myń stýdentti jasandy ıntellekt kásipkerligine oqytý úlgisiniń ekinshi kezeńine tartý. Bul baǵytta JI qosymsha qun jasaı alady.
Úshinshi jáne tórtinshi kezeńderde — eldegi bilim berý júıesin jetildirýge múmkindik beretin akseleratsııalyq baǵdarlama ınkýbatsııalanady. Osylaısha jyl saıyn júzdegen, myńdaǵan startaptar qurylmaq.
— Óńirdegi ýnıversıtetterde jasandy ıntellekt boıynsha zerthanalar men kafedralardyń ozyq akademııalyq tájirıbesi alynǵan 20 arnaıy ortalyq qurylady. Barlyq jetekshi ýnıversıtetterge jalpy kompıýterlik klasterdiń esepteý qýatyn paıdalanyp, ózderiniń esepteý ınfraqurylymyn damytý úshin kvotalar beriledi. Sonymen birge, ǵylymı ınstıtýttar men ýnıversıtetterdiń barlyq granttyq zertteýleri bizdiń ulttyq sýperkompıýterimiz — Alem Cloud esepteý qýatyn mindetti túrde paıdalanýy qajet bolady. Bul mindetti talapqa aınalady, — dedi Saıasat Nurbek.
Besinshi kezeńde lokalızatsııalanǵan úlken tildik modelderdi usynylady.
— Biz ulttyq memlekettik tildiń lıngvıstıkalyq korpýsyn jasaýdy kózdep otyrmyz. Qazaq tiliniń ulttyq korpýsyn damytý úshin derekter jınaýmen aınalysamyz. Sondyqtan KazLM Hugging Face platformasynda qoljetimdi boldy, — dedi mınıstr.
Aıta keteıik, elordada Memleket basshysynyń tóraǵalyǵymen Jasandy ıntellektini damytý jónindegi keńestiń alǵashqy otyrysy ótip jatyr.
Buǵan deıin Prezıdent Qasym-Jomart Toqaev elimizde jasandy ıntellekt salasyna mamandanǵan jańa zertteý ýnıversıtetin qurýdy tapsyrǵan edi.