44 jyl qyzmet etken An-26 ushaǵy sońǵy ret kókke kóterildi
ASTANA. KAZINFORM — Qazaqstandaǵy osy tıptegi sońǵy áskerı-tasymal ushaǵy — An-26 áskerı qyzmetin aıaqtady. Ulttyq ulannyń avıatsııa quramynda uzaq jyl paıdalanylǵan áýe kemesi sońǵy reısin oryndady.
Іshki ister mınıstrliginiń habarlaýynsha, An-26 ushaǵynyń tarıhy 1981 jyldan bastalady. Kıev avıatsııalyq zaýytynda shyǵarylǵan áýe kemesi alǵashqy on jyl ishinde KSRO Memlekettik qaýipsizdik komıteti Shekara áskerleriniń avıatsııasy quramynda qyzmet atqarǵan.
Ushaqtyń negizgi bazasy Qazaq KSR aýmaǵynda ornalasyp, ońtústik shekarany kúzetýge baılanysty mindetterdi oryndaýǵa, áskerı qyzmetshiler men júkterdi tasymaldaýǵa paıdalanylǵan.
1992 jyly An-26 Ulttyq ulannyń avıatsııasy quramyna berildi. Sodan beri ushaq áskerı qyzmetshiler men júkterdi tasymaldap, túrli qyzmettik mindetterdi oryndady.
— Uzaq jyldar boıy paıdalanylǵan áýe kemesi zamanaýı talaptarǵa saı jańǵyrtylyp, IKAO standarttaryna sáıkestendirilgen. Bul An-26 ushaǵyna Qazaqstan aýmaǵynan bólek, jaqyn shetelderge de ushýǵa múmkindik bergen, — delingen habarlamada.
Ulttyq ulan avıatsııasynyń quramynda An-26 8 400 saǵat ushqan. Al ushaqtyń jalpy qyzmet ótili 44 jylǵa sozyldy.
Ushaqtyń sońǵy reısi ony uzaq jyl basqarǵan ekıpaj músheleri úshin erekshe mánge ıe boldy. 3656 áskerı bóliminiń ushqyshy Medet Seıtov An-26 ushaǵyn 15 jyldan beri basqaryp kelgen. Ol ekıpaj quramyndaǵy osy tıptegi áýe kemesiniń sońǵy ushqysh-nusqaýshysy.
Sońǵy reısten keıin ekıpaj músheleri uzaq jyl boıy birge qyzmet atqarǵan áýe kemesimen qımaı qoshtasty.
Osylaısha, An-26-nyń paıdalanýdan shyǵarylýymen Qazaqstan áskerı avıatsııasyndaǵy bul tıptegi ushaqtardyń 44 jyldyq tarıhy aıaqtaldy. 8 400 saǵat áýede bolǵan áskerı-tasymal ushaǵy endi jaýyngerlik qyzmet atqarmaıdy.
