44 gradýs qatty ystyq: aldaǵy eki kúnge arnalǵan aýa raıy boljamy

ASTANA. KAZINFORM – «Qazgıdromet» RMK-sy shildeniń 16-17 aralyǵyndaǵy kún raıy boljamyn jarııalady. 

— Qazaqstan aýmaǵynyń basym bóliginde atmosferalyq frontaldy bólikterdiń ótýine baılanysty jańbyr, naızaǵaı kútiledi. 16 shildede batysta, soltústikte, 17 shildede soltústik-batysta jáne soltústikte qatty jańbyr, burshaq, daýyldy jel boljanady. Tek eldiń ońtústiginde jaýyn-shashynsyz, ystyq aýa raıy kútiledi. Respýblıka boıynsha jeldiń kúsheıýi boljanady, al soltústik-batysta túnde jáne tańerteń tuman túsedi, — delingen habarlamada.

Kúndiz 16–17 shildede respýblıkanyń ońtústik-batysynda óte qatty ystyq 39–44°S, 17 shildede ortalyqtyń jekelegen aýdandarynda 40°S deıingi óte qatty ystyq boljanady.

Ońtústikte 40–44°S, ońtústik-shyǵysta 40–42°S, soltústik óńirlerde 30–35°S, al shyǵysta 35–38°S qatty ystyq kútiledi.

Buǵan deıin habarlanǵandaı, Qazaqstannyń 16 óńirinde daýyldy eskertý jarııalandy.