436 myń teńge: Jambyl oblysynda tanysyn pyshaqtaǵan er adam em shyǵynyn óteıdi

ASTANA. KAZINFORM – Jambyl oblysynda tanysyna aýyr dene jaraqatyn keltirgeni úshin sottalǵan er adam jábirlenýshiniń emdelýine jumsalǵan 436 myń teńgeni memleketke qaıtarýǵa mindetteldi. Bul qarajat medıtsınalyq kómek kórsetýge bıýdjetten bólingen, dep habarlaıdy Kazinform tilshisi.

436 myń teńge: Jambyl oblysynda tanysyn pyshaqtaǵan er adam em shyǵynyn óteıdi
Foto: freepik.com

Tanystar arasyndaǵy janjal pyshaq jaraqatymen aıaqtalǵan. Soqqylardyń biri jábirlenýshiniń keýde tusyna tıip, ókpesi zaqymdanǵan. Jaraqatynyń aýyrlyǵyna jáne asqynýyna baılanysty oǵan shuǵyl ota jasalyp, statsıonarda emdelýge týra kelgen.

Medıtsınalyq kómek aqysyn memleket tólegen. Shyǵyn kólemi 436 myń teńgeni qurady.

2026 jylǵy aqpanda Jýaly aýdandyq soty shabýyl jasaǵan er adamdy densaýlyqqa qasaqana aýyr zııan keltirgeni úshin kináli dep tanyǵan. Osydan keıin Talas aýdanynyń prokýrory emdelýge jumsalǵan qarajatty óndirip alý týraly jeke talap aryz bergen.

Talas aýdandyq sotynyń habarlaýynsha, bul shyǵyndar sottalǵan adamnyń áreketinen tikeleı týyndaǵan. Іs materıaldaryn zerdelegen sot prokýrordyń talabyn qanaǵattandyrdy.

Sot sheshimimen er adamnan memleket kirisine 436 myń teńge óndirip alý belgilendi. Buǵan qosa, ol memlekettik baj salyǵyn da tóleýge tıis.

Aıta keteıik, buǵan deıin Jambyl oblysynyń sottary byltyrǵydan eki ese kóp adamdy aqtaǵanyn jazdyq.