43 jyldan keıin «Qalqaman - Qaraǵandy» tas joly kúrdeli jóndeýden ótedi
ASTANA. QazAqparat - Respýblıkalyq mańyzy bar «Qalqaman - Qaraǵandy» tas jolyna kúrdeli jóndeý jumystary júrgizilmek, dep habarlaıdy pavlodarnews.kz.
Bul jóninde Baıanaýyl aýdanynyń ákimi Orazgeldi Qaıyrgeldınov turǵyndardyń aldyndaǵy eseptik kezdesýi kezinde aıtty.
«Jóndeý jumystarynyń barlyq qujattary daıyn. Aldaǵy bes-alty kúnde konkýrs aıaqtalyp, kúrdeli jóndeý júrgizetin merdiger kompanııa anyqtalady. Bul jobaǵa 6,5 mlrd teńgege jýyq qarjy bólindi. Jumysty naýryz aıynda bastaý kózdelip otyr», - dedi Orazgeldi Qaıyrgeldınov.
«QazAvtojol» UK AQ Pavlodar oblystyq fılıalynyń dırektory Qaırat Karebaevtyń aıtýynsha, «Qalqaman - Qaraǵandy» respýblıkalyq mańyzy bar jol 1965-1975 jyldary salynǵan. Sol ýaqyttan beri kúrdeli jóndeý júrgizilmegen.
«Jalpy uzyndyǵy 205 shaqyrym jol jóndeýden ótpek», - deıdi Qaırat Karebaev.
«Byltyr 30 shaqyrym joldyń jumysy bastalǵan bolatyn, degenmen aıaqtalmaı qalǵan. Oǵan negizgi 172 shaqyrym joldy qosyp jóndeý jasaımyz».
Astanada ótip jatqan konkýrsqa bes kompanııa qatysýda. Sonymen qatar, aýdan ákimi bıylǵy jyly bes baǵyttaǵy aýdandyq mańyzy bar 87,5 shaqyrym avtomobıl joldaryna 1,8 mlrd teńgege ortasha jóndeý jumystary júrgiziletindigin aıtty. Onyń ishinde Alekseevka aýylynan Máshhúr Júsip Kópeev kesenesine deıin - 52 shaqyrymdyq jol. (Aqsan aýylyna - 6,1 shaqyrym, Toraıǵyr aýylyna kireberis - 17 shaqyrym, Toraıǵyr - Jasybaı -12,4 shaqyrym). Buǵan qosa, aýdandyq mańyzy bar «Qarashat - Jaıma» jolynyń 30 shaqyrymyna, ıaǵnı Jańatilek aýylyna deıin ortasha jóndeý jumystaryn júrgizý maqsatynda tıisti qujattar tolyq ázirlengen. Jobalyq quny 631,0 mln teńgeni quraıdy.
