43 jastaǵy Esik turǵyny kisi qolynan kóz jumdy
ALMATY. QazAqparat - Almaty oblysy Esik qalasynda 43 jastaǵy er adam kisi qolynan kóz jumdy. Marqumnyń jary Nazıra Qııatova kúıeýin mert qylǵan qandyqol qylmyskerlerdiń áli de erkindikte júrgenine narazy, dep habarlaıdy QazAqparat tilshisi.
Qaıǵyly oqıǵa 19 maýsymda Esik qalasynda «Sáttilik» dúkeniniń mańynda bolǵan.
Jábirlenýshi taraptyń qorǵaýshysy Tórehan Muhtarov bolǵan oqıǵany baıandap berdi.
«Tańǵy 3 shamasynda Muhıt Ospanov óziniń bajalarymen dúken janynda áńgimelesip turǵan. Sol sátte olarǵa bir top jigit jaqyndap kelip, arasynda bireýi temeki suraıdy. Bir ret suraǵanda Muhıt temeki bergen, ekinshi ret suraǵanda «ana dúkennen al» dep jaýap qaıyrǵan. Sol sátte olardyń biri Muhıtty bir uryp qulatady. Ary qaraı tóbeles bolǵan. Muhıttyń qasyndaǵylardyń kópshiligi taıaq jegen. Muhıt soqqydan esin jıyp turamyn degende taǵy birneshe ret urǵan, basynan tepkilegen, bótelkeler laqtyrǵan. Vıdeosy bar», - dedi Tórehan Muhtarov.
Qorǵaýshynyń aıtýynsha, 19 maýsymda er adam aýyr halde jansaqtaý bólimine tústi.
Dárigerler oǵan mańdaı súıegi, qol-aıaǵy synǵan degen dıagnoz qoıdy. Mańdaıynan soqqy tıgendikten, mıyna qan ketken. Er adam 3 kún komada jatyp, 21 maýsymda kóz jumdy.
Marqumnyń týystary men dostary kelesi kúni álgi dúkenniń qoımasynan kúdikti jigitterdiń birin ustap alǵan.
Qazir sol kúdikti Esik qalasynda qamaýda otyr. Kúdik týǵyzǵan tulǵalardyń barlyǵy 20-30 jastyń aralyǵyndaǵy jastar.
Birneshe kún buryn Muhıttyń týystary jetisin berdi. Marqumnyń artynda qart ata-anasy, áıeli, 4 balasy qaldy.
«QazAqparat» HAA tilshisi atalǵan iske baılanysty oblystyq ІІD-ne arnaıy saýal joldady.
