43 metr bıiktikten sekirip júrgen astanalyqtar bar
ASTANA. QazAqparat - Ár demalys saıyn «FLY Rope Jumping Astana» sharasyn uıymdastyrýshylar qurylysy aıaqtalmaǵan astyq qoımasynyń shatyrynan (43 metr) sekirýdi uıymdastyryp keledi. Bul joly «QazAqparat» tilshisi «qalyqtaýshylardyń» áreketterine kýá bolyp qaıtty.
Basyn tigip, bıikten «qulaǵysy» kelgender áýeli 4000 teńge tóleýi shart. «Al, qaýipsizdik sharalary eskerilgen bul sekirý túriniń adam densaýlyǵyna zııany joq», deıdi uıymdastyrýshylar. Alaıda, olar arnaıy suhbat berýden bas tartyp, odan da tilshilerdiń ózderi kýá bolýy kerektigin aıtty.
Jáı ǵana kýá bolǵysy kelgen adam da ǵımarat shatyryna kóterilýi úshin densaýlyǵynyń jaqsy ekenin rastaıtyn qujattarǵa qol qoıýy kerek. Ókinishtisi, túsirýshi-operatorymyz shatyrdan sekirýge batpady.
Uıymdastyrýshylar arqannyń myqtylyǵyn aıtyp, onymen kólik te súıreýge bolatynyn jetkizdi.
«Qalqyǵan kezde adamnyń ishki organdaryna zaqym kelmeıdi. Biraq, sekirý traektorııasyn saqtaǵan jón», deıdi sekirýshiler.
Qazaqstanda sporttyń osyndaı túri tirkelmegen, biraq oǵan tyıym da salynbaǵan. Ol saıys túrinde ótkizilmeıdi, óıtkeni sporttyń osyndaı ekstremaldy túrinde básekelester bolmaıdy.
