42°C-qa deıingi ystyq: eldiń basym bóliginde aýa raıyna baılanysty eskertý jarııalandy
ASTANA. KAZINFORM – Qazaqstannyń 16 oblysynda aýa raıyna baılanysty eskertý jarııalandy, dep habarlaıdy Qazgıdromet.
Sınoptıkterdiń boljamynsha, Abaı, Shyǵys Qazaqstan, Pavlodar, Almaty, Jetisý, Jambyl jáne Túrkistan oblystarynyń jekelegen aýdandarynda jańbyr jaýyp, naızaǵaı oınaıdy. Keı jerlerde burshaq túsip, ekpindi jel soǵady.
Qyzylorda oblysynyń birqatar aýdanynda shańdy daýyl kútiledi. Al Aqmola, Qaraǵandy, Qostanaı, Soltústik Qazaqstan, Ulytaý, Abaı jáne Shyǵys Qazaqstan oblystarynda túngi jáne tańǵy ýaqytta tuman túsýi yqtımal.
Eldiń basym bóliginde aptap ystyq saqtalady. Aqtóbe, Batys Qazaqstan, Jambyl, Ulytaý, Almaty jáne Jetisý oblystarynda aýa temperatýrasy +35…+38 gradýsqa deıin kóteriledi. Qyzylorda men Túrkistan oblystarynda +40…+41 gradýs, al Mańǵystaý oblysynda 42 gradýsqa deıin ystyq bolady.
Sonymen qatar óńirlerdiń basym bóliginde joǵary jáne tótenshe órt qaýpi saqtalady. Ásirese Atyraý, Mańǵystaý, Qyzylorda, Túrkistan, Jambyl, Almaty, Jetisý, Aqtóbe, Batys Qazaqstan, Qaraǵandy, Ulytaý, Abaı jáne Shyǵys Qazaqstan oblystarynyń jekelegen aýmaqtarynda órt qaýpi óte joǵary deńgeıde bolady.
Aıta ketelik demalys kúnderi aptap ystyq qaıtyp keletini týraly jazǵan edik.
