42500 teńgege úmitkerler Biryńǵaı jıyntyq tólemin aı saıyn tóleı me

NUR-SULTAN. QazAqparat - Biryńǵaı jınaq tólemin (BJT) 42 500 teńge áleýmettik tólem alýǵa ótinish bermeı turyp tólegen durys. Bul týraly búgin Ortalyq kommýnıkatsııalar qyzmetindegi onlaın-brıfıngte QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«Kelesi másele biryńǵaı jıyntyq tólemi jaıynda bolyp otyr. Muny bir azamattar YouTube-ta, basqa jerlerde halyqqa: «Memleket sizderdi aldap jatyr. Beıresmı jumys istep júrgender bir ret qana BJT tólese jetkilikti degenderi ótirik. Ony sizder aı saıyn tóleýlerińiz kerek. Aı saıyn tólemeseńizder keıin moıyndaryńyzǵa qaryz qylyp iledi», dep túsindirip jatyr. Bul - jalǵan aqparat, senbeńizder. Bul - erekshe, tótenshe jaǵdaıǵa qatysty Zań. Sondyqtan siz beıresmı jumys istep júrseńiz, tirshilik jasap aqsha taýyp, sodan qazir aıyrylyp qalsańyz BJT-tyny bir ret qana tóleýińiz kerek», - dedi mınıstr.

Bul rette Birjan Nurymbetov biryńǵaı jınaq tólemin 42 500 teńge áleýmettik tólemge ótinish bermeı turyp tólegen durys ekendigin basa aıtty.

«Osy kúnge deıin biraz azamat aldymen ótinishin berip alyp, odan keıin BJT-ny tólegen. Biz ony túsinemiz. Sondyqtan olardyń BJT-si túsip qalar dep ony tólep qoıǵan 100 myńdaǵan adamnyń ótinishin siz sııaqty jańylysqan adamnyń aqshasy túsip qalar deýmen ary qaraı jibermeı ustap otyrmyz. Sebebi, barlyǵyn biraq tekserýimiz qajet. Beıresmı jumys isteıtinder aldymen biryńǵaı jınaq tólemin tólep, odan keıin bir táýlikten soń ótinish bergenderińiz durys bolar edi», - dedi ol.