42500 teńge alǵan kásipker: Bul kómek otbasymyzǵa edáýir kúsh berdi
Elena Dúısembaeva byltyr «Bastaý bıznas» kýrsyn oqyp, 505 myń teńge grant utyp alǵan. Sóıtip, Pavlodar oblysy Sharbaqty aýdanynyń turǵyny óz kásibin bastaýǵa múmkindik aldy. Joldasy Manarbekpen keńesip, kirpish jasaý jobasyna kiristi. Alaıda elde tótenshe jaǵdaı rejımi engizilip, kirpish quıý jumystary ýaqytsha shegerildi.
«Biz aýdandaǵy Hmelnıtskıı aýylynda turamyz. Kóktem túse shaǵyn kásibimizdi bastaǵymyz kelgen. Biraq sońǵy jaǵdaılarǵa baılanysty jospardy ózgerttik. Sáýir aıynyń basynda esepshotyma 42500 teńgeniń jiberilgeni týraly habarlama keldi. Men ózim ótinish jibermegen edim. Qarajat oıda joqta tústi. Bul kómek otbasymyzǵa edáýir serpin berdi. Azyq-túlikten tarylmaımyz. Negizi kásip ıesi retinde aı saıyn BJT (ESP) tólep turdym. Mine, memleket qoldaýy osyndaıda seziledi», - deıdi Elena Dúısembaeva.
Jas kásipkerdiń aıtýynsha, 505 myń teńgelik qaıtarymsyz granttan bólek, jergilikti ákimdik materıaldyq jaǵynan únemi kómek berip turady. Tıisinshe, ár adam elge paıdasyn tıgizý úshin aıanbaı ter tógýi kerek.
«Búginde zaman talabyna saı, suranysqa ıe mamandardy qaıta daıarlaıtyn kýrstar jeterlik. «Bıznes bastaý» arqyly kásibin dóńgeletip otyrǵan tanystarym bar. Eńbek etkisi keletin adamǵa memleket qanshama múmkindik berip otyr. Tek sony tıimdi paıdalanǵan durys. Máselen, biz qurylysqa paıdalanylatyn materıal túrin shyǵarýdy qolǵa aldyq. Óıtkeni, kirpishke suranys áli bar. Jańa tehnologııalarǵa negizdelgen qural-jabdyqtarymyzdy alyp qoıdyq. Endi kóldeneńnen kelgen keseldi birigip jeńsek, oıǵa alǵan sharýalarymyzdy bastap ketemiz dep oılaımyn. Eldiń basshylary aıaqqa oralǵan qandaı qıyndyqtar bolsa da, ony eńserýge barynsha kúsh salyp jatyr. Bizdiń taraptan qoldaý ǵana qajet», - deıdi jas kásipker.
Ras, kirpish quıý úshin qol kúshi ǵana emes, kásip ıgerý nıeti kerek. 4 bala tárbıelep otyrǵan Dúısembaevtar otbasynda bul qasıet bek ornaǵan. Olardyń basty ustanymy – sapaly eńbek etip, elge paıdasyn tıgizý ǵana!
