42 myń teńge shákirtaqy úshin ustazdyqty tańdaý durys emes – Ashat Aımaǵambetov

NUR-SULTAN. QazAqparat – Shákirtaqysy joǵary dep pedagogıka mamandyǵyn tańdaý durys emes. Bul týraly halyqqa esep berý kezdesýinde QR Bilim jáne ǵylym mınıstri Ashat Aımaǵambetov aıtty, dep habarlaıdy QazAqparat tilshisi.

Búgin halyqqa esep berý kezdesýin ótkizgen mınıstrden agrotehnıka salasynda 3-kýrs oqyp júrgen stýdentterdiń biri bolashaq pedagogtardyń 42 myń teńge shákirtaqy alatyndyǵyn aıta kele, mamandyq aýystyrý múmkindigin suraǵan edi.

«Pedagogıkalyq baǵytqa tek stıpendııa úshin aýysýdyń qajeti joq. Pedagogıka mamandyǵyna ustaz bolýdy armandaǵan, ishki dúnıesiniń daıyndyǵy bar adamdar barýy kerek. Al stıpendııasy 42 myń teńge, basqalardan eki ese joǵary dep barmaq bolsańyz, onda mamandyq aýystyrýǵa keńes bermeımin. Buǵan qosa, siz mysaly veterınarııa mamandyǵy boıynsha 2-3 jyl oqyp, endi pedagogıkalyq mamandyqqa kóshemin deýińiz durys emes. Onyń ústine mundaı múmkindik te bolmaıdy. Birinshiden, kezinde tapsyrǵan UBT balyńyz 75-ten joǵary bolýy tıis. Ekinshiden, prerekvızıtter bar. Mamandyqtardyń bir-birine sáıkestigi, buryn oqyǵan pánderińizdiń sáıkestigi bolýy tıis jáne basqa da talap qoıylady. Sondyqtan meniń oıymsha, ary qaraı da tańdaǵan oqýyńyzdy jalǵastyryp, maman bolyp shyǵasyz dep úmittenemin», - dep jaýap berdi Ashat Aımaǵambetov.

Sonymen qatar mınıstr pedagogıka mamandyǵyna eń myqty, eń bilimdi, eń bilikti túlekterdi oqýǵa túsýge shaqyrdy.

«Bul baǵytta tıisti yntalandyrý jumysyn da júrgizip jatyrmyz. Sondyqtan pedagogıka mamandyǵyna eń myqty túlekter túsip, myqty mamandar bilip alyp, mektepterge jumys isteýge barady dep úmittenemin», - dedi ol.