4,2 mlrd dollar 300 lokomotıvtiń quny ǵana emes – QTJ Wabtec-pen kelisimi týraly túsinikteme berdi

ASTANA. KAZINFORM – «Qazaqstan Temirjoly» ulttyq kompanııasy Kazinform saýalyna joldaǵan jaýapta Wabtec kompanııasymen aradaǵy 4,2 mlrd dollardyń kelisimi týraly keńirek málimet berdi.

Qazaqstan mınorıtarlyq aktsıonerler qaýymdastyǵynyń (QAMS) telegram-arnasy QTJ men Wabtec kompanııasynyń arasyndaǵy sońǵy kelisimniń Qazaqstan úshin tym qymbatqa túsetinin, ár lokomotıvtiń quny naryqtaǵy baǵadan 2 ese qymbat ekeni týraly saraptama jarııalaǵan.

- Aıta ketý kerek, áleýmettik jelilerde 4 mlrd AQSh dollaryna 300 birlik jańa lokomotıv satyp alynatyny týraly aqparat berilgen. 4 mlrd AQSh dollary 300 birlik lokomotıv satyp alýdy ǵana emes, sonymen qatar qoldanystaǵy servıstik shartty 2058 jylǵa deıingi 15 jyl merzimge 405 birlik lokomotıvke uzartýdy, sondaı-aq satyp alynatyn 300 birlik lokomotıvke 2054 jylǵa deıingi 18 jyl merzimge tolyq servıstik qyzmet kórsetýdi uıymdastyrýdy qamtıdy, - dep jazylǵan resmı jaýapta.

Atalǵan kelisim aıasynda Wabtec esebinen KinetiX júıesiniń 5 jıyntyǵyn jóndeý kózdelgen. Naqty aıtsaq, jyljymaly quramdy esepke alý, baqylaý jáne dıagnostıkalaýdyń tsıfrlyq júıesin jetkizý, úsh jyl ishinde 505 birlik lokomotıvtiń tejegish tsılındrleri men kompressorlaryn kúrdeli jóndeý josparlanyp otyr.

- Sondaı-aq, kommertsııalyq jáne áleýmettik turǵyda QTJ úshin úlken artyqshylyqtarǵa qol jetkizildi. Servıstik ortalyqtary bar shalǵaı óńirlerde ornalasqan qyzmetkerler úshin áleýmettik nysandar salý kózdelgen, - dep jazady QTJ baspasóz qyzmeti.

Eske salsaq, Memleket basshysy Qasym-Jomart Toqaevtyń Nıý-Iork qalasyna resmı sapary aıasynda AQSh Saýda mınıstri Govard Latnıktiń qatysýymen amerıkalyq Wabtec kompanııasymen jalpy somasy 4,2 mıllıard dollar bolatyn kelisimge qol qoıý rásimi ótken edi.