4,2 myńǵa jýyq qazaqstandyq jańa bıznes-ıdeıalardy júzege asyrý úshin granttar aldy
ASTANA. KAZINFORM – Jyl basynan beri halyqtyń áleýmettik osal toptaryna jatatyn azamattarǵa jańa bıznes-ıdeıalardy júzege asyrý úshin 4 207 grant, onyń ishinde aýyl turǵyndaryna 2 665 grant berildi. 2025 jyly barlyǵy 9 080 grant berý josparlanyp otyr.
Memlekettik granttardy alýǵa ótinimder 2025 jyldyń 21 mamyry men 3 maýsymy aralyǵynda qabyldandy. Búgingi tańda úmitkerlerdiń ótinishterin qaraý jónindegi komıssııalar óz jumysyn aıaqtap, barlyq qarajat grant alýshylardyń shotyna aýdaryldy.
— Ótinish berýshilerden barlyǵy 11,5 myńnan astam ótinish, onyń ishinde kópbalaly otbasylardan — 7 450, múgedekterden — 1 856, múmkindigi shekteýli balany kútýshilerden — 1 334, ataýly áleýmettik kómek alýshylardan — 289 ótinish qaraldy. Sondaı-aq asyraýshysynan aıyrylǵan 384 adam, qonys aýdarǵan 93, qandastardan 73 ótinish túsken.
Ótinishterdiń eń kóp sany Túrkistan (2 065 adam), Qyzylorda (1 296 adam), Jambyl (1 133 adam) oblystary men Shymkent qalasynan (934 adam), eń az kórsetkish Ulytaý oblysy (78 adam) men Qostanaı oblysynan (202 adam) túsken.
Granttar negizinen tehnologııalyq qural-jabdyqtardy alýǵa — 1 856, taýarlyq-materıaldyq qundylyqtardy, qural-saımandardy satyp alýǵa — 1 236, mal sharýashylyǵyna — 1 013, úı-jaılaryn jalǵa alýǵa — 60 jáne ósimdik sharýashylyǵyna — 42 berildi.
Grant ıegerleri sanattary boıynsha kópbalaly otbasy múshelerine — 2 723, múgedekterge — 657, múgedek balalardy tárbıelep otyrǵan ata-analarǵa — 488, ataýly áleýmettik kómek alýshylarǵa — 126, asyraýshysynan aıyrylý boıynsha járdemaqy alýshylarǵa — 145, qonys aýdarýshylarǵa — 39, qandastarǵa — 29 járdemaqy taǵaıyndaldy, — delingen habarlamada.
Eske salaıyq, granttardy eńbek utqyrlyǵy ortalyqtary úmitkerlerdiń ótinishterin qaraý jónindegi aýdandyq/qalalyq komıssııanyń sheshimi negizinde beredi.
Ótinish berýshiler ózderiniń bıznes-jobasyn komıssııa otyrystarynda usynady. Komıssııa otyrysynyń ótetin orny, kúni jáne ýaqyty týraly habarlama grantqa úmitkerdiń Business.enbek.kz portalyndaǵy jeke kabınetinde kórsetiledi.
Bul rette komıssııanyń árbir múshesi bıznes-jospardy baǵalaıdy jáne kelesi krıterııler boıynsha baǵalaý paraǵyn toltyrady: bıznes-ıdeıanyń básekege qabilettiligi, ótkizý naryqtarynyń damýy, bıznes-jobanyń qarjylyq turaqtylyǵy, kásipkerlik daǵdylarynyń deńgeıi, jańa jumys oryndaryn qurý.
Osylaısha, grant berý týraly sheshimdi komıssııa qabyldaıdy jáne úmitkerlerdiń bıznes-jobalaryn ázirleýdi baǵalaýdyń naqty krıterııleri negizinde júzege asyrylady.
Komıssııanyń sheshimi týraly aqparat ótinish berýshiniń Business.enbek.kz portalyndaǵy jeke kabınetine jiberiledi. Nátıje oń bolǵan jaǵdaıda, ótinish berýshi salyq organdarynda qyzmetin tirkeıdi, banktik derektemelerdi beredi, kelisimge qol qoıady, sodan keıin bólingen qarajattyń paıdalanylýy týraly toqsan saıynǵy esep beredi. Munyń barlyǵy eńbek mobıldiligi ortalyqtaryna barmaı-aq elektrondy túrde júzege asyrylady.
Aıta ketelik Bektenovtiń eskertýinen soń iri bıznes bıýdjetke 47 mlrd teńge salyq tólegen edi.