42 qarjy pıramıdasy joıyldy: Prezıdent Qarjylyq monıtorıng agenttigi tóraǵasyn qabyldady
ASTANA. KAZINFORM - Memleket basshysy Qarjylyq monıtorıng agenttiginiń tóraǵasy Janat Elımanovty qabyldady. Prezıdentke vedomstvonyń 2024 jyly atqarǵan jumysynyń negizgi qorytyndylary men aldaǵy kezeńge arnalǵan mindetteri jóninde málimet berildi.
Qarjylyq monıtorıng agenttiginiń tóraǵasy Memleket basshysyna 2023-2025 jyldarǵa arnalǵan Keshendi jospardyń is-sharalaryn júzege asyrý kóleńkeli ekonomıka deńgeıin 1,3 paıyzǵa tómendetýge múmkindik bergenin baıandady.
Atap aıtqanda, Agenttik 1312 qylmystyq isti tergep-tekserýdi aıaqtap, nátıjesinde 236,8 mıllıard teńgeniń zalalyn ótedi. Qylmystyq jolmen tabylǵan 152,3 mıllıard teńge kiris tárkilendi.
Sonymen qatar uıymdasqan qylmystyq toptarǵa qatysty 20 jáne transulttyq toppen baılanysty 1 sotqa deıingi tergep-tekserý amaldary bastaldy. 42 qarjy pıramıdasy joıylyp, alaıaqtyq shemalardy jarnamalaıtyn 15 myńǵa jýyq saıt pen akkaýnt buǵattaldy, messendjerlerdegi 327 chat jabyldy. Osylaısha 2 mıllıonnan astam azamattyń qarjylaı shyǵynǵa ushyraýyna jol berilmedi.
Budan bólek, áleýmettik jelilerdegi 41 onlaın qumar oıyn alańy, astyrtyn jumys isteıtin 30 oıyn zaly, kazıno men býkmekerlik keńse áshkerelendi. 11,7 myńnan astam onlaın-kazıno saıtyna kirýge tosqaýyl qoıyldy.
Agenttik qyzmetkerleri 120 mıllıard teńge kólemindegi negizsiz bıýdjet shyǵyndarynyń aldyn alyp, zańsyz krıpto almastyrýshy arqyly qylmystyq kiristerdi zańdastyrýǵa nıettengen 36 árekettiń jolyn kesti.
Prezıdentke Qazaqstan, Belarýs jáne Reseı memleketteriniń qarjy barlaýshylary birlese júrgizgen arnaıy operatsııanyń qorytyndysy týraly esep berildi. Onyń nátıjesinde úsh aýqymdy «narkoshop» jabylyp, 35 narkodıler ustalǵan. Jalǵan qarjylyq operatsııalar men mámileler jasaǵan 1787 zańdy tulǵanyń qyzmeti toqtatylǵan, sondaı-aq terrorıstik jáne ekstremıstik uıymdardyń shottaryna qarajat aýdarýǵa 1,2 myń áreket anyqtalyp, buǵattalǵan.
Kezdesý sońynda Memleket basshysy Agenttik qyzmetiniń negizgi baǵyttary boıynsha birqatar tapsyrma berdi.