42 gradýs aıaz: Shyǵys Qazaqstan men Qostanaıda jol jabyldy

NUR-SULTAN. QazAqparat - Aýa raıynyń buzylýyna baılanysty elimizdiń birqatar óńirinde jol jabyldy, dep habarlaıdy QazAqparat.

«QazAvtoJol» kásipornynyń aqparatyna sensek, Shyǵys Qazaqstan oblysynda aýa temperatýrasy -32 -35 gradýsqa jetken.

Osyǵan baılanysty 2 qańtar saǵat 17:00 bastap dızelmen júretin avtomobılder jáne qoǵamdyq kóliktiń qozǵalysyna shekteý qoıylady. Olar barlyq baǵyttaǵy joldarda júre almaıdy.

Sonymen qatar Óskemen qalasynan Rahmanov bulaǵyna deıingi 60 shaqyrym jolda da tirkemesi bar júk kólikteriniń qozǵalysy shektelgen.

Odan bólek, Qostanaı oblysynda da aıaz kúsheıip tur, sınoptıkterdiń boljamynsha aýa temperatýrasy -42 gradýsqa jetedi.

Sondyqtan «Mamlıýtka-Qostanaı» tasjolynyń 180-250 shaqyrymy jabyldy. Bul - Soltústik Qazaqstan oblysynyń shekarasy men Uzynkól eldimekeniniń aralyǵy.

Aımaqta búgin saǵat 17:00 bastap «Ekaterınbýrg - Almaty» avtojolynyń 686-729 shaqyrymynda avtokóliktiń barlyq túriniń qozǵalysyna tyıym salyndy.

Eske sala keteıik, biz buǵan deıin Soltústik Qazaqstan jáne Aqmola oblystarynda qatty aıazǵa baılanysty jol jabylǵanyn jazǵan bolatynbyz.