42 eko-joba qolǵa alyndy: Astanada Halyqaralyq Araldy qutqarý qory basqarmasynyń II otyrysy ótti
ASTANA. KAZINFORM – Astanada Qazaqstannyń tóraǵalyǵymen Halyqaralyq Araldy qutqarý qory basqarmasynyń ekinshi otyrysy ótti. Bul týraly Úkimettiń baspasóz qyzmmeti habarlady.
Jıynǵa QR Premer-mınıstriniń orynbasary Qanat Bozymbaevtyń tóraǵalyǵymen ótken is-sharaǵa sý resýrstary jáne ırrıgatsııa mınıstri Nurjan Nurjigitov, Ózbekstan Prezıdentiniń keńesshisi Shýhrat Ganıev, Tájikstan Premer-mınıstriniń orynbasary Sýlaımon Zıezoda jáne Túrikmenstannyń aýyl sharýashylyǵy mınıstri Charyıar Chetıev qatysty.
Baqylaýshy retinde Qyrǵyz Respýblıkasynyń Sý resýrstary, aýyl sharýashylyǵy jáne qaıta óńdeý ónerkásibi mınıstrligi Sý resýrstary qyzmeti dırektorynyń orynbasary Abdybaı Jaıloobaev qatysty.
– Búginde halyqaralyq qoǵamdastyq bizden tek málimdemeler emes, naqty sheshimder kútedi. Aral teńiziniń taǵdyry, transshekaralyq sýdy tıimdi ári ádil paıdalaný, tabıǵı resýrstardy saqtaý – aımaqtyq qana emes, jahandyq mańyzy bar máseleler. Olar ornyqty damý, azyq-túlik pen energetıkalyq qaýipsizdik, sondaı-aq mıllıondaǵan adam turmysynyń sapasymen tikeleı baılanysty. BUU Bas Assambleıasynyń sońǵy otyrysynda eki el basshylary qorshaǵan ortany qorǵaý úshin senim, yntymaq jáne birlesken áreketterdiń mańyzdy ekenin atap ótken bolatyn. Qazaqstan bul kózqarasty tolyq qoldaıdy, - dedi óz sózinde Premer-mınıstrdiń orynbasary Qanat Bozymbaev.
Kezdesýde taraptar kelesi jyly sáýir aıynda ótetin Halyqaralyq Araldy qutqarý qoryna múshe memleketter basshylary keńesiniń otyrysyna daıyndyq barysyn, sondaı-aq Qazaqstannyń 2024-2026 jyldardaǵy tóraǵalyǵy kezeńinde Atqarýshy komıtettiń jumys josparyn júzege asyrý máselelerin talqylady. Jıynǵa qatysýshylar Aral teńizi basseıni elderine kómek kórsetý jónindegi is-qımyl baǵdarlamasynyń jáne Ortalyq Azııanyń turaqty damýy úshin qorshaǵan ortany qorǵaý jónindegi óńirlik baǵdarlamanyń oryndalý barysyn talqylady. Sondaı-aq olar Halyqaralyq Araldy qutqarý qorynyń uıymdyq qurylymy men quqyqtyq bazasyn jetildirý jónindegi jumys tobynyń qyzmetin qarastyrdy.
Qazirgi ýaqytta Aral teńizi basseıninde 42 ekologııalyq joba iske asyrylyp jatyr. Sonymen qatar Dúnıejúzilik banktiń qoldaýymen eki aımaqtyq granttyq jobany bastaý múmkindigi pysyqtalyp jatyr.
Otyrysta qatysýshylar Halyqaralyq Araldy qutqarý qory Atqarýshy komıtetiniń 26 naýryzdy Aral teńizi, Ámýdarııa jáne Syrdarııa ózenderiniń halyqaralyq kúni dep jarııalaý týraly usynysyn nazarǵa aldy.
Kezdesý sońynda Halyqaralyq Araldy qutqarý qory basqarmasynyń sheshimderine qol qoıý rásimi ótti.