42 500 teńge úshin jaýapkershilik – Eńbek mınıstrligi qazaqstandyqtardan túsinistik tanytýdy suraıdy
«Búgingi kúni áleýmettik jelide eń kóp talqyǵa túsip jatqan taqyryptyń biri – 42 500 teńgeni alǵan kezdegi jaýapkershilik. Ol jaıly jazǵan adamdardyń kóbi yzaǵa berilip, odan bas tartý kerek pe, álde nelikten az somaǵa bola qatań baqylaý qoıylǵan degen syńaıda oılaryn bildirip jatyr. Bul suraqtardyń nege kóbeıip ketkenin túsinýge bolady. Máseleni túsindire keteıin», - dep Facebook-paraqshasynda jazǵan Narıman Muqyshev mynadaı stastıstıka keltiredi.
Qazirgi tańda elimizde 3,3 mln adamǵa 42 500 teńgelik áleýmettik tólem taǵaıyndalǵan. Ótinim alǵash qabyldana bastaǵaly beri 20 kúnniń ishinde ǵana osynsha adam qamtylǵan. Vıtse-mınıstr bul rette áleýmettik tólem shynynda da TJ kezinde kirisin joǵaltqan adamdarǵa berilýi kerektigin eske salady. Alaıda, kirisin joǵaltpaǵan ári qashyqtan jumys istep jatqan adamdardyń ózi ótinim berip jatqan kórinedi.
«Bálkim bireý jaı ǵana teskerip kórýdi, al ekinshisi qosymsha kiris alǵysy kelgen bolar. Qazir TJ rejımi bolǵandyqtan biz qujattar paketin surap jatqan joqpyz. Ótinim eń qarapaıym jolmen berilgennen keıin biz ony avtomatty túrde qarap, sheshim qabyldaımyz. Osymen is bitti. Alaıda, «jalǵan málimet» bergen adammen jaýapkershilik birge erip júredi. Sol sebepti kirisin joǵaltpaǵan jáne atalmysh tólemdi suraǵan adamdarǵa jaýapkershiliktiń baryn eskertip jatyrmyz», - deıdi ol.
Eńbek jáne halyqty áleýmettik qorǵaý vıtse-mınıstri atap ótkendeı, eger áleýmettik tólemdi qatelesip alǵandar ony qaıtaratyn bolsa, olar jaýapkershilikke tartylmaıdy.
«Eger siz TJ kezinde jumystan aıyrylyp, atalmysh tólemdi alsańyz – demek bári durys, bizdiń taraptan eshqandaı suraq týyndamaıdy. Al eger tabysyńyzdy joǵaltpaı, atalmysh tólemdi alsańyz – azamattyq jaýapkershilikti tanytyp, atalmysh tólemnen bas tartýdy suraımyz. Onda eshqandaı suraq týyndamaıdy. Eger aılyq alyp jatqannan keıin BJT tólegenińizben, TJ-ǵa baılanysty jumystan bosap, aýdarym men salyqty aýdarmasańyz, 42 500 teńge sizge tıesili. Bizdiń taraptan eshqandaı ýáj bolmaıdy», - dedi ol.
Eske sala ketsek kúni keshe Memlekettik komıssııanyń shuǵyl shtaby 42 500 teńge tólemin taǵaıyndaý erejesindegi ózgeristerdi jarııalaǵan bolatyn. Al QR Eńbek jáne halyqty áleýmettik qorǵaý mınıstrligi tólemdi qaıtarýǵa nıetti adamdar ony bankterdiń smartfondaǵy qosymshasy arqyly jasaı alatynyn málim etken edi.
