42 500 teńge tólemdi qansha azamat ekinshi ret aldy

NUR-SULTAN. QazAqparat - 7 mamyrdaǵy jaǵdaı boıynsha 2,1 mln qazaqstandyq tótenshe jaǵdaı rejımi kezeńinde tabysynan aıyrylýyna baılanysty Memlekettik áleýmettik saqtandyrý qorynan 42 500 teńge mólsherindegi tólemdi ekinshi ret aldy.

Bul týraly QR Eńbek jáne halyqty áleýmettik qorǵaý mınıstrliginiń baspasóz qyzmeti habarlaıdy.

Buǵan deıin habarlaǵandaı, tólemdi esepteý úshin alǵashqy aı retinde 16 naýryzdan bastap 15 sáýir aralyǵyndaǵy ýaqyt esepteledi. Ekinshi aı — 16 sáýirden 11 mamyrǵa deıingi aralyq.

Joǵaryda aıtylǵandarǵa sáıkes, 16 sáýirge deıin ótinish bergen azamattar (áleýmettik járdemaqylar taǵaıyndaý qashan jasalǵanyna qaramastan), tótenshe jaǵdaı kezinde tabysynan aıyrylýyna baılanysty Memlekettik áleýmettik saqtandyrý qorynan tólemder taǵaıyndaý erejesinde kórsetilgen sharttardy saqtaı otyryp, 42 500 teńge tólemge ekinshi aıda úmitker bola alady.

Esterińizge sala keteıik, 42 500 teńge tólemi engizilgen sátten bastap ony 4,5 mln adam aldy.