42 500 teńge: Ereje ózgere me
«Áleýmettik tólem tóleýge qatysty erejelerdi aldaǵy 1-2 kúnde pysyqtap, aıaqtaımyz. Beısenbi kúni múmkin bolsa, aldaryńyzǵa taǵy kelip, sol pysyqtalǵan tetikter týraly tolyq aqparat bergim keledi. Al qazir qandaı ózgerister múmkin ekendigin sizderge jetkizsem. Birinshiden, jaldamaly jumysshylarǵa, qyzmetkerlerge qatysty bolmaq. Biz búgingi jaǵdaılardy eskerýge májbúrmiz. Eń aldymen tótenshe jaǵdaı rejımine qaraǵanda búgingi shekteýler kezinde biraz mekeme jumysyn jasap jatyr. Qurylys, óndiris, tipti qyzmet kórsetý, saýda salasynda da keıbir shekteýlermen jumys júrgizilýde»,- dedi mınıstr Ortalyq kommýnıkatsııalar qyzmetindegi brıfıng barysynda.
Onyń atap ótýinshe, ekinshiden, ár óńirdiń bas sanıtar dárigeri sol oblysqa ǵana qatysty erekshe shekteýler ornatyp jatyr.
«Úshinshiden, 1 sáýirden bastap biraz mekeme, biraz sala jumysshylar úshin mindetti zeınetaqy jarnalaryn nemese áleýmettik jarnalardy tóleýden bosatyldy. Sondyqtan búgin atalǵan jarnalar arqyly qadaǵalaý múmkindigimiz shektelgen. Osyǵan baılanysty jaldamaly jumysshylarǵa qatysty osy joly zeınetaqy jarnamasy, áleýmettik jarnasy tólengeni týraly talap qoımaımyz. Ótken joly 12 aıda keminde bir tólem bolýy kerek degen talap bolǵan. Bul joly onyń esh máni joq»,- dedi ol.
Mınıstrdiń aıtýynsha, buǵan deıingi 42 500 teńge tóleý tájirıbesimen jaldamaly jumysshylar úshin ótinishti tek onyń jumys berýshisi ǵana beretin bolady.
«Jumys berýshi qyzmetkerin aqysyz demalysqa jibergenin rastap, óziniń jumysshylarynyń atynan tapsyrys beredi. Ol úshin aldaǵy 1-2 kúnde portalymyzda jumys berýshilerge qyzmetkerleriniń tizimin, oǵan qatysty málimetterdi engizýi úshin óte yńǵaıly servıs jasaımyz. Óz kezeginde jumysshylar jumys berýshisiniń ótinish bermegenin, ótinishiniń qanaǵattandyrylǵanyn anyqtaýǵa arnalǵan servıs qyzmetine júgine alady», - dedi Birjan Nurymbetov.