42 500 teńge áleýmettik tólemnen salyq ustalmaıdy - Eńbek mınıstri

NUR-SULTAN. QazAqparat - 42 500 teńge áleýmettik tólem azamattardyń esepshotyna tolyq kólemde túsedi. Bul týraly búgin Ortalyq kommýnıkatsııalar qyzmetindegi brıfıngte QR Eńbek jáne halyqty áleýmettik qorǵaý mınıstri Birjan Nurymbetov aıtty, dep habarlaıdy QazAqparat tilshisi.

«42 500 teńge ataýly áleýmettik kómek alyp júrgen kisilerdiń tabysyna kirmeıdi. Onyń tabys retinde eseptelmeıtindigin sizderge naqty aıtamyn. 42 500 teńge alǵandar bolashaqta zeınetkerlikke shyqqanda bul ýaqyty eńbek ótili retinde esepteledi. Zańǵa mundaı ózgeris engizilgen», - dedi ol.

Onyń aıtýynsha, 42 500 teńge mólsherindegi áleýmettik tólemnen salyq, zeınetaqy tólemderi ustalmaıdy.

«Keıbireýler «qolǵa 42 500 teńge túspeıdi eken» dep aıtyp júr. Tolyq túsedi. Eshqandaı salyq ta, alym da ustalmaıdy jáne odan nesıe qaryzy, kommýnaldyq qaryzdardy ustaýǵa bolmaıdy. Sizge 42 500 teńge taǵaıyndalsa, onda sol soma esepshotyńyzǵa túsedi», - dedi mınıstr.

Birjan Nurymbetov bir otbasyda 3-4 adamda tótenshe jaǵdaıǵa baılanysty tabysynan aıyrylsa, onda olardyń barlyǵy da 42 500 teńge áleýmettik tólem alatyndyǵyn basa aıtty.