41 jastaǵy balýan «Qostanaı qyrany» atandy
QOSTANAI. QazAqparat - «Qostanaı» sport kesheninde qazaq kúresinen Elbasy Nursultan Nazarbaevtyń júldesi úshin «Qostanaı qyrany» oblystyq irikteý týrnıri márege jetti, dep habarlaıdy QazAqparat.
Aıta ketý kerek, bul mártebeli jarys bıyl jetinshi ret uıymdastyrylyp otyr. Aldymen, aýdan, qalalardyń balýandary óz óńirlerinde irikteý týrnırin ótkizdi. Sodan jeńip shyqqan boz kilem sheberleri fınaldyq kezdesýge jınaldy. Shetinen «Sen tur, men ataıyn» deıtin sańlaqtar. Eki kúnge sozylǵan dodada palýandar segiz salmaq dárejesi boıynsha beldesti.
Máselen, 55 keli salmaqta qostanaılyq Álisher Muhamedjanov týrnır chempıony atandy. 60 kelide Myltyqbaı Ábdýaıtovtyń baǵy jandy. 66 kelide kilemge shyqqan arqalyqtyq Aqjol Qazymbek te eshkimge ese jibermedi. 74 kelide synǵa túsken jankeldındik Rýslan Ibraev óz qarsylastaryn tegis tize búktirdi. 82 kelide Arqalyqtan kelgen Nursultan Sálimjanov týrnır jeńimpazy atansa, 90 keli salmaqta Altynsarın aýdanynyń palýany Berik Talasovqa teń keler qarsylas tabylmady. 100 keli salmaqta taǵy bir altynsarındik Temirlan Saparov jeńimpaz dep tanyldy. Al, 100 keliden joǵary, asa aýyr salmaqta arqalyqtyq Ǵabıt Balǵynbaev jeńiske jetti.
Qazaq kúresiniń eń qyzyǵy - «Túıe palýan» básekesi. Absolıýttik synǵa 30-ǵa tarta balýan jazylypty. Tartysty ótken jarystyń fınalynda qazaq kúresinen Azııa chempıony, halyqaralyq dárejedegi sport sheberi Ramıl Sharygın men birneshe márte el chempıony, sport sheberi Temirlan Saparovtyń joly túıisti. Jankúıerlerdiń qyzý qoldaýyna ıe bolǵan fınaldyq kezdesý 41 jastaǵy sheber Ramıl Sharygınniń paıdasyna sheshildi. Temirlan Saparov ekinshi oryndy qanaǵat tutty. Endi osy eki palýan oblys namysyn respýblıkalyq «Qazaqstan barysy» týrnırinde qorǵaıtyn bolady.
Jeńimpazdardy oblys ákimi Arhımed Muhambetov quttyqtady. Ol óz sózinde Tobyl-Torǵaı óńirinde qazaq kúresiniń bási joǵary ekendigin atap ótti.
