4,1 mlrd teńgelik joba: Sozaq aýdany tabıǵı gazben qamtyla bastady
TÚRKІSTAN. KAZINFORM – Túrkistan oblysynyń ákimi Nuralhan Kósherov jumys saparymen Sozaq aýdanyna baryp, Sholaqqorǵan aýyldyq okrýginde tabıǵı gazben jabdyqtaý jelilerin iske qosý saltanatyna qatysty.
Oblys basshysy aýdan turǵyndaryn tarıhı oqıǵamen quttyqtap, Sozaq aýdanyna tuńǵysh ret tabıǵı gaz berilip otyrǵanyn atap ótti.
– Búgin qart Qarataýdyń baýraıyndaǵy Sozaq aýdanynda tarıhı sátke kýá bolyp otyrmyz. Sholaqqorǵan aýylynda tabıǵı gaz jelileri iske qosylyp, eldiń kópten kútken armany oryndaldy. Memleket basshysy Qasym-Jomart Kemeluly Toqaev 10 aqpanda ótken Úkimettiń keńeıtilgen otyrysynda halyqtyń ómir súrý sapasyn arttyrý, aýyldyq eldi mekenderdi áleýmettik-ınjenerlik ınfraqurylymmen qamtamasyz etý jóninde naqty tapsyrma bergen bolatyn. Bul baǵytta óńirde aýqymdy jumystar atqarylyp keledi. 2025 jyly oblysta 87 gaz nysanynyń qurylysy qolǵa alyndy. Onyń ishinde 45 joba aıaqtalyp, 70 myń halqy bar 41 eldi meken tabıǵı gazǵa qosyldy. Ótken jyldyń qorytyndysymen 606 eldi meken gazben qamtylyp, 1,9 mln-nan astam turǵyn «kógildir otynnyń» ıgiligin kórdi. Búgingi joba – sol jumystyń naqty nátıjesi. Sozaqtaǵy AGTS-y bar magıstraldy gaz qubyrynyń mańyzy erekshe. Buǵan deıin oblystyń barlyq aýdan, qalasy gazben qamtylyp, tek Sozaqta ǵana bul másele sheshilmegen edi. Endi aýdan turǵyndary da gazdyń ıgiligin kórip, turmys sapasyn jaqsartady. Sonymen qatar ekologııany jaqsartýǵa, ınvestıtsııa tartýǵa jáne kásipkerlikti damytýǵa jol ashylady, – dedi Nuralhan Kósherov.
Saltanatty shara barysynda Sholaqqorǵan aýyldyq okrýgindegi tabıǵı gaz jelileri resmı túrde iske qosylyp, turǵyn úıde gaz jaǵý rásimi ótkizildi.
Jobanyń jalpy quny 4,1 mlrd teńgeni quraıdy. Qurylys jumystary 2019 jyly bastalyp, 2025 jyldyń jeltoqsan aıynda aıaqtalǵan. Jobanyń qýattylyǵy – saǵatyna 30 000 tekshe metr. Joba tolyq iske qosylǵan jaǵdaıda Sholaqqorǵan aýyldyq okrýgindegi 4 600 turǵyn úı tabıǵı gazben qamtylady.
Sondaı-aq atalǵan avtomattandyrylǵan gaz taratý stantsııasy arqyly aýdannyń ózge de eldi mekenderin kezeń-kezeńimen gazben qamtý josparlanǵan.
Sozaq turǵyndary jobany júzege asyrýǵa atsalysqan oblys, aýdan ákimdikterine jáne «QazaqGaz» AQ-na alǵys bildirdi.