40 mln teńge zalal: júıege jalǵan málimet engizgen HQKO qyzmetkeri sottaldy

ASTANA. KAZINFORM — Elorda soty aqparattyq júıege jalǵan málimetter engizip, aýqymdy qarjylaı zalal keltirgen Halyqqa qyzmet kórsetý ortalyǵynyń burynǵy qyzmetkerine úkim shyǵardy.

— 2024 jylǵy 8 qazanda aıyptalýshy Reseı azamatynyń atynan belgisiz adam usynǵan qujattar negizinde aqparattyq júıege bile turyp jalǵan málimetter engizgen. Keıin sol berilgen JSN-ǵa bank shoty ashylyp, oǵan 40 mln teńge aýdarylǵan. Bul áreket azamat pen memleketke zalal keltirdi, — delingen sot úkiminde.

Sot otyrysynda aıyptalýshy áıel ózin aqtaýdy suraǵan, al memlekettik aıyptaýshy oǵan 3,5 jyl bas bostandyǵynan aıyrý jazasyn surady. Sýdıa sottalýshynyń kámeletke tolmaǵan eki balasy bar ekenin eskerip, oǵan raqymshylyq aktisin qoldandy.

Nátıjesinde aıypty áıelge 2 jyl kolonııada jazasyn óteý jáne 2 jyl boıy shetel azamattaryna JSN berý quqyǵynan aıyrý jazasy taǵaıyndaldy.

Aıta ketetin jaıt, sot úkimin tyńdaýǵa Halyqqa qyzmet kórsetý ortalyǵynyń operatorlary profılaktıkalyq maqsatta qatysty. 

Úkim kúshine engen joq. 

Eske sala ketsek, Úkimet basshysy Oljas Bektenov aqparattyq júıe jıi istemeı qalatyndyǵyn aıtyp, Halyqqa qyzmet kórsetý ortalyqtarynyń qyzmetin synǵa alǵan edi. 

Sondaı-aq jyl basynda HQKO jáne medıtsınalyq mekeme qyzmetkerleri qylmystyq is boıynsha kúdikke ilindi.