408 tehnıka jáne 700 jumysshy: Astana qysty qarsy alýǵa daıyn
ASTANA. KAZINFORM — Bıyl qala kóshelerin tazalaý jáne kútip-ustaý jumystary kúsheıtilgen rejımde júrgizilip jatyr. «Astana Tazalyq» mekemesiniń qoımalarynda 1 200 m³-den asa qum, 4 400 tonna kóktaıǵaqqa qarsy qospalar jáne 1 000 tonna reagent saqtaýly.
Qar qalyń túsetin, jeli qatty Astananyń qysy — kommýnaldyq qyzmet úshin naǵyz synaq. «Astana Tazalyq» kompanııasynyń basshylyǵy osy syndarly kezeńge qalaı daıyndalǵanyn ashyq ári jan-jaqty kórsetti.
Mekeme basshysy Zamır Sagınov qala tazalyǵyn qamtamasyz etetin jandardyń eńbegin erekshe atap ótti.
— Qala tańyn ashatyn da, kósheni qystan aman alyp shyǵatyn da — osy eńbek adamdary. Qardyń astynda qalmaıtyn da, kóktaıǵaqta súrindirmeıtin de — olardyń mańdaı teri, — dedi ol.
«Astana Tazalyq» JShS-niń málimetinshe, bıylǵy qysqy maýsymda qala kósheleri men joldaryn tazalaý jáne kútip-ustaý jumystary kúsheıtilgen rejımde júrgizilip jatyr. Kún saıyn jelige 700 jol jumysshysy shyǵyp, orta eseppen 408 arnaıy tehnıka qar tazalaý jáne aýa raıynyń ózgerýine jedel áreket etý úshin daıyn turady.
— Qajetti materıaldar qory da tolyq kólemde jınaqtalǵan. Qoımalarda 1 200 m³-den astam qum, 4 400 tonna kóktaıǵaqqa qarsy qospalar jáne 1 000 tonna reagent saqtaýly. Al arnaıy tehnıkanyń úzdiksiz jumysyn qala boıynsha ornalasqan úsh suıyq reagent quıý pýnkti qamtamasyz etedi. Olar «Esil», «Nura», «Saraıshyq», «Almaty», «Saryarqa» jáne «Baıqońyr» aýdandaryna qyzmet kórsetip, astanalyqtardyń jolda alańsyz qozǵalýyna múmkindik beredi, — dedi mekemeniń bas dırektory.
Kásiporyn aldaǵy maýsymdyq júktemelerge tolyq daıyn ekenin málimdep, qalanyń kommýnaldyq ınfraqurylymynyń turaqty jumysyn qamtamasyz etý úshin barlyq qajetti sharalar qabyldanǵanyn atap ótti.
Budan buryn elordada «Tsıfrlyq jol qaǵazy» júıesi iske qosylǵanyn jazǵan edik. Endi Astana kóshelerine shyqqan ár tehnıka qandaı baǵytta júr, qandaı kólemde reagent shashty, qaı ýaqytta jumys bastady — bárin naqty ýaqyt rejıminde kórsetetin bolady.