400 mln teńge: Aqtóbede aýyldy aýyz sýmen qamtýǵa arnalǵan joba nátıje bermedi
AQTÓBE. KAZINFORM — Yrǵyzdyń Jarma aýylynda sý qubyryn tartý jobasyn jasaýǵa 213 mln teńge, al qurylys-montajǵa 188 mln teńge bólinip, ıgerildi. Arada 2 jyl ótkennen keıin uńǵyma sýy ishýge jaramsyz bolyp qalǵan. Qazir tek mal sýarýǵa paıdalanady.
2020 jyly sol kezdegi oblys ákimi Ońdasyń Orazalın Yrǵyz aýdany Jarma aýylyna baryp, turǵyndardyń qatysýymen sý aıdaý júıesin iske qosty. Arada 2 jyl ótkennen keıin aýyldaǵy sý tatyp ketip, ishýge jaramaı qalyp tur. Qazir jergilikti ákimdik ózge jerden barlaý jumystaryn júrgizip, sý qoryn izdep jatyr.
— Uńǵymany tereń qazyp, aşy qabatqa ketip qalǵan bolýy múmkin. Qazir zerttelip jatyr. Jarmada burynǵy qudyq ta bar. Ony qarap, sý alýǵa qaýiptenip otyrsyz. Sebebi ol jerdiń sýy joǵary qabatta ornalasqan eken. Negizi Jarma aýylynyń óziniń aınalasynda tek aşy sý shyqqan. Sol kezde tek bir ǵana núkteden tabylǵan. Jobalyq-smetalyq jumystarǵa 213 mln teńge, al qurylys-montajǵa 188 mln teńge bólingen. Qazir Qutıkól men Amankól aýyl aýyldarynyń ortasynda Áıim qumy bar. Aqtóbe oblystyq turǵyn úı-kommýnaldyq sharýashylyq basqarmasy izdeý-barlaý jumystaryn júrgizip jatyr, — dedi Yrǵyz aýdandyq qurylys, sáýlet, turǵyn úı-kommýnaldyq sharýashylyǵy, jolaýshylar kóligi jáne avtomobıl joldary bólimi Nurbergen Bekeev.
Onyń aıtýynsha, qazir uńǵymalar qazylyp, alǵashqy qorytyndysy da shyǵa bastady. Bul joba osy Jarma, Qutıkól aýyl turǵyndaryn aýyz sýmen qamtýǵa baǵyttalyp otyr. 2023 jyly bastalǵan joba eki jylǵa sozylyp, bıyl nátıjesi shyǵýy múmkin.
— Qazir aýyl turǵyndary burynǵy eki qudyqtyń sýyn iship otyr. Al ortalyqtandyrylǵan sý qubyry arqyly berilip jatqan sý ishýge jaramsyz. Onyń qorytyndysy shyqty. 2020 jyly iske qosylǵan sý jelisi eki jyldan keıin syr bere bastady. Birese tuşy bolyp, birese aşy bolyp tur. Aýylda 43 úı bar. Sol adamdar eki qudyqtan sý alyp ishedi, kóligi bar adamdar kórshi Qutıkól aýylynan tasıdy. Qutıkól 15 shaqyrym jerdegi aýyl, — dedi Amankól aýyldyq okrýginiń ákimi Abylaı Spanov.
Ázirge aýyldy sýmen qamtý úshin tasymaldaý qarastyrylmaǵan.
Eske salsaq, 2024 jyldyń qorytyndysyna súıensek, 319 eldimekenniń 291-i (91,2%) nemese 923,7 myń adam (99,5%) aýyz sýmen qamtamasyz etilgen.
Qazirgi kezde 28 (8,8%) eldimeken sý uńǵymasyn paıdalanyp otyr.