4000 metr bıiktikte 13 saǵatqa sozylǵan túngi qutqarý operatsııasy aıaqtaldy

ASTANA. KAZINFORM – Almaty oblysy Talǵar aýdanyndaǵy Fızkýltýrnık shyńynda reseılik 72 jastaǵy týrıst jaraqat alyp, ony qutqarý operatsııasy 13 saǵattan astam ýaqytqa sozyldy, dep habarlaıdy TJM baspasóz qyzmeti.

Keshki ýaqytta týrıstiń aıaǵyn úlken tas basyp qalyp, ol aýyr jaraqat alyp, qan joǵaltqan. Er adam taýda ulymen birge bolǵan, alaıda baılanys bolmaǵan. Jas jigit birneshe shaqyrym tómen túsip, baılanys ustap, kómek shaqyrýǵa májbúr boldy.

- Oqıǵa ornyna QR TJM Respýblıkalyq jedel-qutqarý jasaǵynyń jáne Almaty qalasy TJD qutqarý qyzmetiniń kúshteri jiberildi. Toǵyz qutqarýshy eki tehnıkamen jáne dronnyń kómegimen taýǵa attandy. Jol tastar men muzdyqtar arqyly, túngi ýaqytta jáne tórt myń metrden astam bıiktikte ótti. Jaraqat alǵan adamǵa jetý bes saǵattan astam ýaqytty aldy, - dep jazylǵan aqparat.

Qutqarýshylar alǵashqy medıtsınalyq kómek kórsetip, onyń jaǵdaıy nasharlaı bastaǵandyqtan shuǵyl túrde tómenge kóshirýdi bastady. Túnde operatsııaǵa qosymsha kúshter tartyldy.

12 tamyz kúni tańerteń Bogdanovıch muzdyǵyna QR TJM «Qazavıaqutqarý» tikushaǵy kelip, jaraqat alǵan týrıst, onyń uly jáne bir qutqarýshy Boraldaı áýejaıyna jetkizildi. Keıin er adam Almaty qalasynyń klınıkalyq aýrýhanasyna jetkizildi.

Qutqarý operatsııasy bıik taýly, qıyn relef jaǵdaıynda ótti jáne 13 saǵattan astam ýaqytqa sozyldy.

Aıta keteıik, búgin Ordjonıkıdze shyńynda jaraqattanǵan alpınıst tikushaqpen qutqaryldy.