400 jyl buryn sýǵa batqan keme tabyldy
ASTANA. QazAqparat - Arheologtar Portýgalııa jaǵalaýyna jaqyn mańda osydan 400 jyl buryn sýǵa batyp ketken saýda kemesin tapty, dep habarlaıdy bbc.com.
«Tarıhshylardyń pikirinshe, bul sońǵy ondaǵan jyldar ishindegi, al Portýgalııa úshin tarıhta ózindik oryn alar mańyzdy ashylym»,- deıdi arheologııalyq ekspedıtsııanyń basshysy Jorje Freıre.
Kemeni Lıssabonǵa jaqyn ornalasqan Kashkaısh qalasyna taıaý jerde, 12 metr tereńdikten tapty.
Sýǵa batqan korabldiń mańynda keramıkalyq ydystar, Portýgalııa gerbi bar zeńbirekter shashylyp jatqan.
Arheologtardyń paıymynsha, sýdno Úndistannan qaıtyp kele jatqan. Shamamen 1575 - 1625 jyldar aralyǵynda sýǵa batqan bolýy yqtımal.
