«400 tátti taqpaq»: balalarǵa arnalǵan taqpaqtar jınaǵynyń tanystyrylymy ótti
ASTANA. KAZINFORM – Búgin elordada belgili qalamger Baıanǵalı Álimjanovtyń balalarǵa arnalǵan «400 tátti taqpaq» atty taqpaqtar jınaǵynyń tanystyrylymy ótti.
Kitapta Otan, otbasy, ana tili, oqý-bilim, adamgershilik qundylyqtar, merekeler, qazaqtyń tyıym sózderi syndy balalarǵa arnalǵan túrli taqyryptar qamtylǵan.
– Bul eńbegim balalar úshin qundy rýhanı azyq bolady dep oılaımyn. Úshinshi ret basylyp, taratylyp jatyr. Ómirden alynǵan qysqa-nusqa, tátti taqpaqtar. Balalardy telefonnan alystatyp, kitap oqýǵa baýlýymyz qajet. «400 tátti taqpaq» kitabynda balalarǵa qajetti barlyq taqyryp qamtylǵan. Jınaq ata-analarǵa, balabaqsha tárbıeshilerine jáne bastaýysh synyp muǵalimderine arnalǵan taptyrmas kómekshi qural. Ana tilimizdi balalardyń sanasyna sińirip, onyń qasıetin sezinip ósýine óte paıdaly kitap, – deıdi aqyn Baıanǵalı Álimjanov.
Jınaqqa engen óleńder oqýǵa jeńil, jattaýǵa yńǵaıly jáne este tez saqtalady. Sondaı-aq kitap ásem sýrettermen bezendirilgen.
Aıta keteıik, taqpaqtar jınaǵy Marwin/Meloman dúkenderi jelisinde ótip jatqan BOOKFEST 2025 festıvali aıasynda tanystyryldy. Festıval aıasynda tek kitap satyp alý múmkindigi ǵana emes, ártúrli jastaǵy adamdardy biriktiretin úlken ádebı orta qalyptasady. Basty maqsat – oqyrmandardy álemdik ádebı jaýharlarmen tanystyrý, oqý mádenıetin kúndelikti ómir saltyna aınaldyrý jáne otandyq avtorlardy qoldaý.
Jyl saıyn myńdaǵan oqyrmandy biriktiretin shara bıyl da aýqymdy baǵdarlama usyndy:
• úzdik kitaptar jeńildik baǵamen;
• syılyqtar men tosynsyılar utysy;
• otandyq jáne sheteldik avtorlarmen kezdesýler;
• tanymal kásipkerlermen ashyq suhbattar;
• sheberlik saǵattary, dárister jáne avtograf-sessııalar.
Qazan aıynda búkil Qazaqstan boıynsha kitap festıvali ótetinin jazǵan bolatynbyz.