400 myńnan astam balaǵa qoldaý jasalady – Úkimet basshysy
ASTANA. KAZINFORM – Densaýlyq saqtaý mınıstrligi men óńir ákimdikteri mektepterlegi sanıtarııalyq normalardyń saqtalýyn turaqty baqylaýǵa alady. Bul týraly Úkimet otyrysynda Premer-mınıstr Oljas Bektenov málim etti.
- Memlekettik qoldaýǵa muqtaj barlyq otbasylarǵa materıaldyq jáne áleýmettik kómek kórsetilýge tıis. Ol úshin jergilikti bıýdjetterde qajetti qarajat kózdelgen. Bul 400 myńnan astam balaǵa qoldaý kórsetýge múmkindik beredi. Óńir ákimderine kómektiń shyn máninde muqtaj jandarǵa berilýin qamtamasyz etip, árbir naqty jaǵdaı boıynsha ýaqtyly sharalar qabyldaýdy tapsyramyn. Balalardyń jan-jaqty damýy men tabysty bilim alýy mektepterdegi sapaly ári durys tamaqtandyrýǵa da baılanysty. Densaýlyq saqtaý mınıstrligi men óńir ákimdikteri ónimderdiń sapasy men sanıtarııalyq normalardyń saqtalýyn turaqty baqylaýǵa alsyn, - dedi O. Bektenov.
Sonymen qatar Úkimet basshysy oqý jylynyń bastalýyna qaraı kolledjder men ýnıversıtetterdiń ınfraqurylymyn, jataqhanalardy jáne oqytý baǵdarlamalaryn talapqa saı daıyndaýdy qamtamasyz etýdi tapsyrdy.
- Oqý-aǵartý, Ǵylym jáne joǵary bilim mınıstrlikteri ákimdiktermen birlesip, tamyz aıynyń sońyna deıin oqý jylynyń bastalýyna tolyq daıyndyqty qamtamasyz etsin, - dedi mınıstr.
Buǵan deıin habarlanǵandaı, eki oblysta mektepterdiń qaýipsizdik júıesinde kemshilikter anyqtaldy.
