400 myń aıyppul jáne 30 kúnge qamaý: Almatyda jol erejelerin elemegen júrgizýshi jazalandy
ALMATY. KAZINFORM – Almatyda jol-kólik oqıǵasynan memlekettik nómeri joq kólikpen qashyp ketken júrgizýshiniń beınejazbasy tarady.
Bul derekke qatysty Almaty qalasynyń Polıtsııa departementi jaýap berdi. Tártip saqshylary Raıymbek dańǵylynda jol qozǵalysy erejelerin óreskel buzǵan Hyundai Elantra avtokóliginiń júrgizýshisi ustalǵanyn málimdedi. Onyń kólik quralyn basqarý quqyǵy bolmaǵan.
- Júrgizýshiniń kim ekeni anyqtaldy. Ol Almaty qalasynyń 23 jastaǵy turǵyny bolyp shyqty. Ol jol qozǵalysy erejelerin óreskel buzǵany úshin oǵan birqatar ákimshilik quqyq buzýshylyq boıynsha jaýapqa tartyldy, - dep habarlady departamentten.
Polıtsııa málimetinshe, quqyq buzýshyǵa manevr jasaý, memlekettik tirkeý nómirinsiz kólik júrgizý, kólik áınekterin kúńgirtteý, jol tańbalarynyń talaptaryn saqtamaý jáne kólik quralyn basqarý quqyǵy joq bola tura kólik basqarý faktileri boıynsha ákimshilik hattamalar toltyrylǵan.
Odan bólek jol-kólik oqıǵasy boıynsha jınaqtalǵan materıaldar Almaty qalasynyń mamandandyrylǵan aýdanaralyq ákimshilik sotyna joldanǵan.
Sot sheshimimen ol 30 táýlikke ákimshilik qamaqqa alyndy jáne oǵan 100 AEK kóleminde aıyppul salyndy.
Eske salaıyq, Almatyda polıtsııa janynda arandatýshylyq beınejazba túsirgen turǵyn ustaldy.
