400-ge jýyq kásipker qarjylaı qıyndyq saldarynan salyq tóleminiń merzimin shegerýge májbúr bolǵan

ASTANA. KAZINFORM – Qarjylaı qıyndyq saldarynan salyq mindettemesin oryndaýy qıyndaǵan 395 kásipkerge  jalpy somasy 4,5 mlrd teńge bolatyn bereshekti shegerýge ruqsat berildi. Bul týraly Memlekettik kirister komıteti Bereshekpen jumys basqarmasy basshysynyń orynbasary Araılym Esqalıeva onlaın baspasóz máslıhatynda aıtty.

- Qazir 395 salyq tóleýshige jalpy somasy 4,5 mlrd teńgeniń salyq beresheginiń merzimin ózgertýge ruqsat berildi, - dedi ol.

Aıta ketý kerek, Qazaqstan zańnamasynda ýaqytsha qarjylaı qıyndyqqa tap bolǵan salyq tóleýshilerge salyq bereshegin keıinge qaldyrý, tóleý merzimin keıinge shegerý múmkindigi qarastyrylǵan. Araılym Esqalıevanyń aıtýyna qaraǵanda, onyń eki merzimi bar. Birinshisi – bereshekti 6 aıǵa deıin shegerip, bir jolda tóleý múmkindigi. Ekinshisi – aı saıyn nemese 3 aı saıyn 3 jylǵa deıingi merzim ishinde bólip tóleý múmkindigi.

- Salyq beresheginen bólek jer telimin paıdalanǵany úshin, jer betindegi sý kózderin paıdalanǵany úshin jáne qorshaǵan ortaǵa keri áser tıgizgeni úshin alynatyn tólemderdiń merzimin de ózgertýge bolady. Al tólem kózderinen ustalatyn jeke tabys salyǵy, aktsızder, Eýrazııalyq ekonomıkalyq odaq aýmaǵynan ımporttalatyn qosylǵan qun salyǵy, bonýstar men Ulttyq qorǵa tólenetin salyq túrleriniń merzimin ózgerýge ruqsat joq, - deıdi ol.

Salyq tóleýshiler mundaı ótinishti halyqqa qyzmet kórsetý ortalyqtaryna nemese salyq organdaryna baryp, salyq tóleýshiniń jeke kabıneti arqyly onlaın rejımde bere alady.

Komıtet ókili ótinish ıesi kepil retinde energııamen, jylýmen, sýmen jabdyqtaıtyn nysandardy, tárkilengen múlikterdi, jalǵyz baspanany, tez búlinetin shıkizat pen azyq-túlikti qoıa almaıtynyn atap ótti.

Buǵan deıin salyq bereshegin keıinge shegerýge negiz bolatyn sebepterdi atap jazǵan edik.