400-den astam salymshy 1 mıllıard teńgeden astam qarjy salǵan pıramıdanyń jumysy toqtatyldy

ASTANA. KAZINFORM – Qarjylyq monıtorıng agenttiginiń Shymkent qalasy boıynsha departamenti prokýratýranyń úılestirýimen «Aıala Gold» qarjy pıramıdasynyń qyzmetin toqtatty, dep habarlaıdy agenttiktiń baspasóz qyzmeti.

Baspasóz qyzmetiniń málimetterine qaraǵanda, zergerlik buıymdardy satatyn kompanııa retinde jasyrynyp, kúdiktiler azamattarǵa aı saıyn 50–60% kóleminde kepildendirilgen tabys ýáde etip, ınvestıtsııa salýdy usynǵan. Sonymen qatar, salynǵan qarajattyń saqtalatynyna sendirgen.

Alaıda, tólemder naqty paıda esebinen emes, jańa qatysýshylardan túsken qarajat esebinen júzege asyrylǵan.

Nátıjesinde qarjylyq pıramıdaǵa 400-den astam salymshy tartylyp, olar 1 mıllıard teńgeden astam qarajat salǵan.

Kúdiktiler qylmystyq jolmen alynǵan tabysqa boı kóterip jatqan turǵyn úı kesheninen eki páter satyp alǵan. Sot sanktsııasymen bul páterlerge tyıym salyndy.

Budan bólek, kúdiktiler óz týystaryn qarjylyq shemaǵa tartyp, olardy «dropper» retinde paıdalanǵan — ıaǵnı basqa salymshylardan túsken qarajatty olardyń bank rekvızıtteri arqyly qolma-qol aqshaǵa aınaldyrǵan.

- Qarjylyq pıramıdanyń uıymdastyrýshysy eki aı merzimge qamaýǵa alyndy. QR QPK-niń 201-babyna sáıkes, ózge aqparat jarııa etilmeıdi, - delingen habarlamada.

Aıta keteıik, Qarjylyq monıtorıng agenttigi jyl basynan beri 47 zańsyz qumar oıynynyń jumysyn toqtatty.