400-den astam Kóliktegi ІІD qyzmetkerleri marapattaldy
ASTANA. QazAqparat - Búgin Kóliktegi ІІD qyzmetkerleri Qazaqstan polıtsııasy jáne QR memlekettik qyzmetshiler kúnin atap ótti. Saltanatty sharaǵa departament basshylyǵy jáne ishki ister organdarynyń ardagerleri qatysty. Sondaı-aq, merekelik jıynǵa qyzmettik mindetin óteý kezinde erlikpen qaza tapqan saqshylardyń týystary da qatysty, dep habardaı mekemeniń baspasóz qyzmeti.
Shara ádettegideı «Máńgilik umytylmas esimder» eskertkishine gúl shoqtaryn qoıýdan bastaldy. Departament qyzmetkerleri men qurmetti qonaqtar qyzmettik mindetin óteý kezinde kóz jumǵan áriptesterin bir mınýttyq únsizdikpen eske aldy.
«Biz búgin ishki ister organdarynyń ardagerlerine olardyń kóp jyldyq adal jáne jankeshti qyzmetteri úshin erekshe alǵys aıtamyz. Sondaı-aq, qyzmettik boryshtaryn óteý kezinde erlikpen qaza tapqan polıtseılerdiń óshpes rýhy aldynda bas ıip, olardyń erlikterine taǵzym etemiz. Olardyń qaısar minezi men antqa adaldyǵy biz úshin otansúıgishtiktiń, týǵan elge degen mahabbattyń úlgisi bolyp qala bermek», - dedi Departament bastyǵy polıtsııa polkovnıgi Amanjol Qabylov. Ol barsha jınalǵandarǵa densaýlyq, otbasylyq baqyt pen Otan aldyndaǵy jaýapty qyzmetterine tabystar tiledi.
Aıta keterligi, departament qurylǵannan beri qyzmettik boryshtaryn óteý kezinde 11 kólik polıtsııasy qaza tapqan. Olardyń arasynda Qyzylorda stantsııasyndaǵy Іshki ister jelilik bóliminiń jedel ýákili Muratbek Ómirbekov te bar. Ol 1992 jyly arnaıy operatsııa barysynda eki asa qaýipti qylmyskerdi zalalsyzdandyrý kezinde alǵan aýyr jaraqattan kóz jumǵan.
M. Ómirbekov qaza bolǵannan keıin ІІ dárejeli «Aıban» ordenimen marapattaldy. Onyń uly Rınat Ómirbekov áke izin jalǵastyryp júr. Ol Shıeli stansasyndaǵy jelilik polıtsııa bóliminde qyzmet etedi.
Baqdáýlet Elshinbekovtyń kórsetken erligi Arys qalasy turǵyndarynyń áli kúnge deıin esinde.
1988 jylǵy 17 maýsym kúni túngi kezekshilikten bosaǵan Arys stansasyndaǵy ishki ister jelilik bólimi qyzmetkeriniń úıine kele jatqan. Mılıtsııa starshınasy ózi turatyn úıdiń mańynda qylmystary úshin buryn eki ret sottalǵan, qylmyskerlerdiń arnaıy komendatýrasynan qashyp shyǵyp, izdeýde júrgen azamatty baıqap qalady. Ol ile-shala arnaıy jasaqqa habar berip, ózi qarýly qylmyskerden kóz jazyp qalmaý úshin onyń izine túsedi. Qylmyskerdi quryqtaý kezinde Baqdáýlet júrek tusynan alǵan oq tıip qaza tapty, keıin bir jyldan soń onyń otbasyna Qyzyl Juldyz ordeni tabys etildi. Búginde Arys qalasynda bir kóshege B. Elshinbekovtyń aty berilgen.
Jınalǵan ardagerlerge ІІO-na sińirgen kópjyldyq adal eńbekteri úshin nagradalar tabys etildi. Sonymen qatar, merekege oraı 400-den asa departament qyzmetkeri men memlekettik ákimshilik qyzmetshisi medaldar jáne alǵys hattarmen marapattaldy.
