40 jyldaı KSRO pasportymen júrgen atyraýlyq jańa kýálik aldy
Mahambet aýdandyq polıtsııa bóliminiń málimetinshe, KSRO-nyń qyzyl pasportymen júrgen 59 jastaǵy áıel Mahambet aýdanynda turady.
«Tańdaı aýylynda turatyn 1964 jylǵy áıel elimizdiń jańa jeke kýáligin almaǵan. Ol osyndaǵy sharýa qojalyǵyna jumys isteýge kelgen. Osy kezge deıin KSRO-nyń eski úlgidegi qujatymen júrgeni aýdandyq aýrýhanaǵa densaýlyǵyna baılanysty em alýǵa júgingende anyqtaldy», - dep habarlady aýdandyq polıtsııa bóliminen.
Eski tólqujatpen júrgen áıelge aldymen Tańdaı dárigerlik emhanasynyń feldsheri Saıagúl Jubatova kómek bergen. Al, Mahambet aýdandyq polıtsııa bólimine qarasty kóshi-qon qyzmeti tobynyń ınspektory, polıtsııa maıory N.Tashekenova jedel áreket etip, 59 jastaǵy turǵynnyń jeke kýáligin alýy úshin tıisti qujattardy resimdegen.
Eske sala ketelik, buǵan deıin KSRO tólqujatymen júrgen atyraýlyq 58 jasynda jeke kýáligin alǵanyn jazǵan bolatynbyz. Oblystyq polıtsııa departamenti baspasóz qyzmetiniń málimetine súıensek, KSRO tólqujatyn aýystyrmaǵan 58 jastaǵy Tóremurat Qamıev Inder aýdanynda turady. Onyń eski tólqujatpen júrgenine 29 jyl bolǵan. Turǵynnyń aıtýynsha, onyń osynsha ýaqyt aralyǵynda qujatyn jańartpaýyna otbasylyq jaǵdaıy sebep bolǵan.
Sondaı-aq, 53 jastaǵy Atyraý turǵyny ómirinde birinshi márte jeke kýálik alǵany habarlanǵan edi. Turǵyn 2021 jyldan beri densaýlyǵyna baılanysty Atyraý oblystyq ftızıopýlmonologııa ortalyǵynda em alýǵa júgingen. Sol kezde qujatqa qatysty birqatar qıyndyq týyndaǵan. Oǵan «Meıirim Qazaqstan» úkimettik emes uıymynyń ókilderi, emhana qyzmetkerleri men kóshi-qon ınspektorlary jeke kýálik alýyna kómektesken.