40 jyldan keıin alǵash ret Jetisaıdaǵy magıstraldy kanaldar tazartylyp jatyr

ASTANA. KAZINFORM — Atalǵan kanal Jetisaı aýdanyndaǵy úsh aýyldyq okrýgtiń 13 myń gektar jerin sýarmaly sýmen qamtamasyz etedi, dep habarlaıdy Sý resýrstary jáne ırrıgatsııa mınıstrligi.

Túrkistan oblysyna jumys sapary barysynda Sý resýrstary jáne ırrıgatsııa mınıstri Nurjan Nurjigitov Jetisaı aýdanyndaǵy magıstraldy kanaldardy tazalaý jumystarynyń barysy men nátıjeleri týraly esepti tyńdady.

«Qazsýshar» RMK-nyń jergilikti fılıaly uzaq jyldardan beri alǵash ret K-21 jáne K-34 magıstraldy kanaldarynda mehanıkalyq tazalaý jumystaryn júrgizdi. Qazir K-25 kanalynda jumystar jalǵasyp jatyr.

Aýdandaǵy eń iri kanaldardyń biri sanalatyn K-21 kanaly úsh aýyldyq okrýgtegi 20 myń gektar sýarmaly jerdi sýmen qamtamasyz etedi. Búginde arnaıy tehnıkanyń kómegimen kanaldyń barlyq 22,8 shaqyrymy tolyq tazartyldy. Bul nysanda mundaı aýqymdy jumystar sońǵy 40 jyldan astam ýaqyt ishinde alǵash ret júrgizilip otyr. Uzyndyǵy 18,5 shaqyrym bolatyn K-34 kanalynda tómengi bóliktegi 7,5 shaqyrym ýchaskeni tazalaý josparlanǵan. Vegetatsııa kezeńinde bul bólikte sýdy jetkizýde qıyndyqtar týyndaıtyn. Endi ony tazalaý jumystary tolyq kólemde aıaqtaldy.

Al uzyndyǵy 28,2 shaqyrymdy quraıtyn K-25 kanaly Jetisaı aýdanyndaǵy úsh aýyldyq okrýgtiń 13 myń gektar jerin sýarmaly sýmen qamtamasyz etedi. Qazirgi tańda munda 10 shaqyrym ýchaskede mehanıkalyq tazalaý jumystary júrgizilip jatyr. Bul jumystarǵa bes arnaıy tehnıka tartylǵan. Búginge deıin 4 shaqyrym kanal tazartyldy.

— Mınıstrlik «Qazsýshar» fılıaldaryn jańa ári zamanaýı arnaıy tehnıkamen qamtamasyz etý boıynsha aýqymdy jumys atqaryp keledi. Búginde shamamen 600 tehnıka jetkizildi. Josparlanǵan barlyq jobany sapaly iske asyrý úshin barlyq jaǵdaı jasalǵan. Kanaldardy tazalaý jumystary vegetatsııa kezeńi bastalǵanǵa deıin aıaqtalýy tıis, bul sharýalardy sýmen ýaqytyly ári sapaly qamtamasyz etý úshin qajet, — dedi Sý resýrstary jáne ırrıgatsııa mınıstri Nurjan Nurjigitov.

Jergilikti turǵyndar atqarylǵan jumystar úshin Sý resýrstary jáne ırrıgatsııa mınıstrligine jáne «Qazsýshar» RMK-nyń Túrkistan fılıalyna alǵystaryn bildirip jatyr.

— Byltyr K-34 kanalynda laılaný men ósimdikterdiń kóbeıýine baılanysty sý jetkizýde qıyndyqtar bolǵan edi. Qazir júrgizilgen jumystardyń arqasynda kanal tolyq tazartyldy. Bıyl sharýalar sý máselesimen betpe-bet kelmeıdi dep úmittenemiz. Tehnıka bolmaǵandyqtan, mundaı aýqymdy tazalaý jumystary kópten beri júrgizilmegen edi. Mınıstrliktiń jumysynyń arqasynda endi mundaı múmkindik paıda boldy, — deıdi Jetisaı aýdanyndaǵy Temirjol aýylynyń turǵyny Sahtillá Temiralıev.

Buǵan deıin bıyl transshekaralyq sý resýrstarynyń spýtnıktik derekterimen almasý platformasy iske qosylatynyn jazǵanbyz.