40 jastaǵy Mennı Pakıao jas boksshydan aılasyn asyryp, WBA tıtýlyna ıe boldy

NUR-SULTAN. QazAqparat – Búgin AQSh-tyń Las-Vegas qalasyndaǵy MGM Grand arenasynda ótken boks keshinde 40 jastaǵy fılıppındik boksshy Mennı Pakıao (61-7-2, 39 KO) amerıkalyq Kıt Týrmandy (29-0, 22 KO) jeńip, WBA Super nusqasy boıynsha jartylaı orta salmaqtaǵy álem chempıony atandy, dep habarlaıdy Sports.kz.

Mennı Pakıao WBA «turaqty» chempıony bolatyn. Ol bul tıtýldy bir jyl buryn argentınalyq Lýkas Matıas Mattıseni nokaýtqa jiberip, jeńip alǵan. Al Týrman 2017 jyldyń naýryzynda óz otandasy Dennı Garsııadan basym túsip, WBA «sýperchempıony» atanǵan.

40 jastaǵy Fılıppın boksshysy jekpe-jekti kúshti qarqynmen bastady. Іri deneli qarsylasynan jyldam ekenin kórsetip, sol artyqshylyǵyn paıdalanýǵa tyrysty. Alǵashqy raýndta opponentin nokdaýnǵa jibergenimen, Týrman tez qalpyna keldi.

Aıqastyń ortasyna taman Pakıao ekpinin báseńdetip, jas boksshyǵa múmkindik berdi. 10-raýndta Mennı amerıkalyq qarsylasynyń denesin aıaýsyz soqqylap, esten tandyra jazdady. Degenmen, Kıt raýndtyń sońyna deıin shydap baqty. 12 raýndtyń nátıjesi boıynsha ádil qazy sheshimimen Mennı Pakıao jeńiske jetti.