40-tan astam ustaz Túrkııada tájirıbe almasyp qaıtty

TÚRKІSTAN. QazAqparat - Túrkistan oblysynyń ákimi Janseıit Túımebaevtyń qoldaýymen 9-14 aralyǵynda 40-tan asa ustaz Túrkııa elinde tájirıbe almasyp qaıtty. Bul týraly oblys ákiminiń baspasóz qyzmetine silteme jasap QazAqparat habarlaıdy.

Anadoly jerine taban tiregen túrkistandyqtar áýeli Ystanbul qalasyndaǵy Abaı atyndaǵy mektepke at basyn burdy. Zamanaýı úlgidegi memlekettik mekemede bilim berýdiń jańa tehnologııalarymen tanysyp, «Doga» kolledjinde qonaqta boldy. Stýdentter tehnıkalyq bilimderimen, ǵylymı izdenisterimen, halyqaralyq jetistikterimen erekshelenedi.

Aıta keterligi, Túrkııada oqý jyly 15 qyrkúıekte bastalyp, 15 maýsymda aıaqtalady. Onda memlekettik, jekemenshik jáne keshki mektepter bar. Oqý jyly 2 jartyjyldyqqa bólinedi. Aptalyq júktemege 20-24 saǵat aǵylshyn, 5-9 saǵat nemis tili engizilgen. Tańdaý pánderine saı ata-analar balalaryna din, aspazdyq, óner sabaqtaryn úıretýge quqyly. Qyzdar men er balalar bólek synyptarda bilim alady. Shahmat páni aptasyna 8 saǵat ótkiziledi. Robototehnıka mektep qabyrǵasynda mindetti sanalady. Dene shynyqtyrý sabaǵynyń 10-12 saǵaty basseıinge arnalǵan.

Oblys basshysynyń qoldaýymen qolǵa alynǵan aıryqsha joba jyl sońyna deıin jalǵasady.