40 saǵat boıy Diablo III oınaǵan taıvandyq jigit qaıtys boldy
ASTANA. 20 shilde. QazAqparat - 18 jasar taıvandyq 40 saǵat boıy bas almaı Diablo III oıynyn oınaǵannan keıin, qaıtys boldy, dep habarlaıdy The Australian. Oqıǵa Taıvan qalasynda, araldyń ońtústik-batysynda oryn alǵan.
Portaldyń jazýy boıynsha, 13 shilde kúni bozbala oıyn oryndarynyń birinen bólme jaldap alyp, onda eki kúnge jýyq ýaqytty oıyn oınaýmen ótkizgen. Dalaǵa shyǵyp, tamaqtanbaǵan da. 15 shildeniń tańerteńinde oıynhana qyzmetkerleri ony kompıýter ústelinde uıyqtap jatqan jerinen oıatyp jiberedi. Ornynan turǵan jigit bir-eki qadam jasap baryp, qulap túsken. Oıynshynyń ólimin jergilikti aýrýhana dárigerleri rastady.
Ólimniń sebepteri ázirge belgisiz. Degenmen BAQ ókilderiniń aıtýynsha, bir orynda qozǵalmaı uzaq ýaqyt boıy otyrý júrek-qan tamyrlarynyń jumysyn qıyndatyp jiberýi múmkin.
Oqıǵa belgili bolǵan soń, Diablo III oıynyn qurastyrýshy Blizzard kompanııasy oıynshynyń týystaryna kóńil aıtyp, oıynqumarlarǵa oıynmen tym áýestenbeýdi «eskertti».
Ekshn-RPG janryndaǵy Diablo III oıyny satylymǵa 15 mamyrda túsken bolatyn. Ol kompıýterlik oıyndar tarıhyndaǵy eń paıdaly ónimderdiń biri bolyp tabylady. Satylymǵa túsken kúni álem boıynsha 3,5 mln. danasy satyldy, al alǵashqy bir aptasynda 6,3 mln. danaǵa jetti. Keıinirek Diablo III AQSh-ta mamyrdaǵy eń úzdik oıyn dep tanyldy.
